<p style="text-align: justify;">کابل (پژواک، ۱۵ غويی ۱۴۰۱): سیګار وایي، د امریکا د ۷ میلیارده ډالرو په ارزښت پوځي تجهیزات او وسلې افغانستان کې پاتې دي او د دغه هېواد د مرکزي استخباراتو پخوانی مشر بیا د دغو وسلو او مهماتو پاتې کېدل د اندېښنې وړ بولي.</p>
<p style="text-align: justify;">د راپورونو له مخې، د افغانستان د بیارغونې لپاره د امریکا ځانګړې څارونکې ادارې (سیګار) د امریکا کانګرس ته یو درې میاشتنی راپور وړاندې کړی. د راپور پر اساس، له افغانستانه د امریکایي پوځیانو د وتلو پر مهال د څه باندې ۷ میلیارده امریکایي ډالرو په ارزښت وسلې او پوځي تجهیزات افغانستان کې پاتې دي.</p>
<p style="text-align: justify;">سرچینې لیکلي چې ځیني دا تجهیزات د کارېدو نه وو او د ترمیم په حالت کې وو.</p>
<p style="text-align: justify;">په دغه راپور کې راغلي چې د بګرام پوځي هوایي ډګر کې د پاتې ۸۱ پوځي چورلکو یوازې یوه کوچنۍ برخه د کارولو وړ دي، چې شپږ 'بلک هاک' چورلکې هم پکې شاملې دي.</p>
<p style="text-align: justify;">د امریکا متحدو ایالتونو د مرکزي استخباراتو د ادارې پخواني مشر جنرال ډیویډ پټریویس، له امریکا غږ سره په مرکه کې ویلي، دغه پوځي تجهیزات او وسلې چې په افغانستان کې پاتې دي، په هغه کچه چې راپور ورکړل شوی جدي نه، خو د اندیښنې وړ دي.</p>
<p style="text-align: justify;">هغه ویلي چې په یادو وسلو او تجهیزاتو کې ځیني یې د استفادې وړ دي، خو شک لري چې الوتکې او پوځي موټر به سم وي؛ ځکه چې هغه اضافي پرزې نه لري او کارول یې هم د افغانستان د سرپرست حکومت کسانو ته اسانه نه دي.</p>
<p style="text-align: justify;">د افغانستان سرپرست حکومت تر دې دمه په دې اړه څه نه دي ویلي.</p>
