تاجکستان کې د امریکا سفیر ویلي، په دغه هېواد کې ولاړې الوتکې بېرته افغانستان ته نه ورکوي

[restrict paid="true"]

<p style="text-align: justify;">کابل (پژواک، ۲۱ غویی ۱۴۰۱): په تاجکستان کې د امریکا سفیر ویلي چې دغه هېواد ته د افغانستان بیول شوې الوتکې بېرته نه ورکوي؛ ځکه یادې الوتکې د امریکا ملکیت دي.</p>

<p style="text-align: justify;">تېر کال په افغانستان کې د حکومت له سقوط وروسته د افغانستان هوایي ځواک لسګونه الوتکې تاجکستان ته بوتلل شوې او تر اوسه همالته دي.</p>

<p style="text-align: justify;">د افغانستان سرپرست حکومت د دفاع وزیر ملا یعقوب څو ځلې له دغو هېوادونو وغوښتل چې د افغانستان الوتکې بېرته ور وسپاري، هغه ګواښ کړی و چې د نه ورکړې په صورت کې به خطرناک عواقب ولري.</p>

<p style="text-align: justify;">خو اوس په تاجکستان کې د امریکا سفیر جان مارک ویلي چې دا الوتکې بېرته افغانستان ته نه سپاري؛ ځکه چې په دوی پورې اړه لري.</p>

<p style="text-align: justify;">د ایشیا پلس رسنۍ د راپور له مخې، جان مارک پرون د تاجکستان پلازمېنه دوشنبه ښار کې د یو خبري کنفرانس پر مهال ویلي چې د تاجکستان له حکومت سره یې په دې اړه تفصیلي خبرې کړې دي. خو هغه د دې خبرو  اترو جزئیات په ډاګه نه کړل.</p>

<p style="text-align: justify;">هغه زیاته کړې: «دا الوتکې په طالبانو پورې اړه نه لري، دا زموږ ملکیت دي او بېرته یې افغانستان ته نه سپارو."</p>

<p style="text-align: justify;">د کابل له سقوط مخکې د افغانستان هوایي ځواک شاوخوا ۱۶۴ بیلابېل ډول الوتکې درلودې، خو اوس مهال یواځې ۸۱ پاتې دي او نورې یې ګاونډیو هېوادونو ته وړل شوې دي.</p>

<p style="text-align: justify;">د امریکا د ستراتيزیکو مطالعاتو مرکز د معلوماتو له مخې، د کابل له سقوط وروسته شاوخوا ۴۵ الوتکې له افغانستان څخه بهر تاجکستان او ازبکستان هېوادونو ته ایستل شوې دي چې پکې جنګي او نورې  C1 30 الوتکې شاملې دي.</p>

<p style="text-align: justify;">له دې مخکې د امریکا د دفاع وزارت ویاند جان کربي هم ویلي وو چې تاجکستان او ازبکستان ته بیول شوې الوتکې بېرته افغانستان ته نه ورکول کېږي.</p>

<p style="text-align: justify;">د یادونې ده، د افغانستان یو شمېر چورلکې چې اوکراین ته د ترمیم لپاره وړل شوې وې، اوس امریکا دغه چورلکې دغه هېواد ته سپارلې دي.</p>

[/restrict]