مهترلام، اسعد اباد (پژواک، ۲۶غویی ۱۴۰۱): د لغمان او کونړ چارواکي وايي چې سږکال په دغو ولایتونو کې د شفتالو په حاصلاتو کې زياتوالی راغلی دی.
د لغمان د کرنې ریاست وایی، سږکال په دغه ولایت کې د شفتالو حاصلات ۱۰۶۰ ټنو ته رسېدلي.
بلخوا، د کونړ د کرنې رياست وايي چې په دغه ولایت کې د شفتالو حاصلات شاوخوا ۱۵ سلنه ډېر شوي.
د لغمان د کرنې ریاست د کرنیزو چارو امر بریالي همدرد پژواک اژانس ته وویل چې دوی په ۷۳ اعشاریه دوه هکتاره ځمکه د شفتالو باغونه لري او سږکال يې ۱۰۶۰ ټنه حاصلات ترلاسه شوي.
همدرد زیاته کړه، تېرکال د شفتالو حاصلات ۹۷۵ اعشاريه دوه ټنه و او سږکال د حاصلاتو اندازه اته سلنه زياته شوې.
بڼوال هم وايي چې سږکال يې د شفتالو حاصلات د تېرکال په پرتله زيات شوي.
د مرکز مهترلام اړوند بصرام کلي اوسېدونکي ذبیح الله چې د شفتالو یو جریب بڼ لري، پژواک ته وویل: «تېرکال مې له خپل باغ څخه ۲۰۰ منه او سږ کال څه باندې ۳۰۰ منه شفتالو ترلاسه کړل.»
د کونړ د کرنې او مالدارۍ رییس ملا عزت الله هدایت هم پژواک ته وویل چې د شفتالو په حاصلاتو کې د پام وړ زياتوالی راغلی.
ده زیاته کړه: «باغداران له شته حاصل څخه خوښ دي، د تېرکال په پرتله ۱۵سلنه زيات شوي او تمه شته چې راتلونکي کلونه به باغونه حاصل لا لوړ کړي.»
نوموړي دغه راز وویل، هڅې يې پيل کړې چې د کونړ مېوو ته په داخل او له هېواده بهر مناسب مارکېټ پيدا کړي.
د کونړ بڼوال هم د شفتالو له حاصلاتو خوښ دي، خو وايي چې حکومت باید د دوی مېوو ته مناسب بازار ومومي.
د سرکاڼو ولسوالۍ اوسېدونکي احسان الله چې د شفتالو شل جریبه بڼ لري، وویل: «موږ سږکال د خپلو باغونو له حاصلاتو خوښ یو او د تېرو کلونو په پرتله حاصلات زیات شوي، خو مارکېټ نه لري.»
د کونړ د مرورې ولسوالۍ د لاهور ډاګ سیمې اوسېدونکي عزت الله هم وویل چې که څه هم سږ کال د شفتالو حاصلات ښه دي، خو د تېرو کلونو په پرتله یې بیه ټيټه ده.
ده زیاته کړه: «په تېر کې به زموږ د باغ یو کیلو ښه شفتالو په شاوخوا دوه سوه افغانۍ پلورل کېدل؛ خو سږکال یو کیلو ښه شفتالو په ۵۰ افغانۍ پلورل کېږي.»
هغه له حکومته وغوښتل چې د کونړ د بزګرو او بڼوالو حاصلاتو ته بازار پيدا کړي.
