<p style="text-align: justify;">تالقان (پژواک، ۲۳ غبرګولی ۱۴۰۱): د تخار د کرنې ریاست وایي، په دغه ولایت کې د تازه مېوو حاصلات د تېر کال په پرتله ۸۰ سلنه ډېر شوي دي.</p>
<p style="text-align: justify;">د تخار د کرنې، اوبو لګولو او مالدارۍ رییس عبدالرحیم احدي پژواک ته وویل، مناسبه اب او هوا په دغه ولایت کې د مېوو د حاصلاتو د زیاتوالي اصلي لامل دی.</p>
<p style="text-align: justify;">نوموړی د سړو خونو نشتوالی د کروندګرو لپاره یوه جدي ستونزه ګڼي خو ډاډ ورکوي چې له موسسو سره په همغږۍ هڅه کوي څو معیاري سړې خونې جوړې کړي.</p>
<p style="text-align: justify;">په همدې حال کې، د تخار بڼوال د تازه مېوو د حاصلاتو له ډېرېدو خوښي څرګندوي، خو د سړو خونو له نشتوالي شکایت کوي.</p>
<p style="text-align: justify;">د دغه ولایت یو بڼوال شریف خان د خپل بڼ مېوې يې تالقانو ښار ته د پلور لپاره راوړې دي.</p>
<p style="text-align: justify;">هغه وایي: «شپږ کاله کېږي چې پر شاوخوا څلور جریبه ځمکه مې مېوه لرونکې نیالګي کېنولي او له همدغه لارې د کورنۍ نفقه برابروم.»</p>
<p style="text-align: justify;">د هغه په وینا، اوسمهال د سړو خونو نشتوالي له امله یو من ګېلاس په ۳۰۰ افغانۍ پلوري، خو که سړې خونې وي نو ښایي خپل محصولات په ښه بیه وپلوري.</p>
<p style="text-align: justify;">هغه له حکومته غواړي څو کروندګرو ته معیاري سړې خونې جوړې کړي.</p>
<p style="text-align: justify;">د تخار ولایت بل کروندګر قدرتالله پژواک ته وویل، تخار یو له کرنیزو ولایتونو دی او که حکومت د کروندګرو د ستونزو هوارولو ته پاملرنه وکړي نو د ناقانونه کډوالۍ مخه به ونیول شي.</p>
<p style="text-align: justify;">دا په داسې حال کې دی چې تخار د افغانستان په شمال ختیځ کې موقعیت لري او ډېری اوسېدونکي یې په کرنې بوخت دي او له همدې لارې د ژوند اړتیاوې پوره کوي.</p>
