<p style="text-align: justify;">لښکرګاه (پژواک، ۶ چنګاښ ۱۴۰۱): د هلمند د کرنې او مالدارۍ ریاست وايي چې د دغه ولایت د مرکز لښکرګاه اړوند بستکلا او د ګرمسېر ولسوالۍ په ريګي سيمه کې د دوو چکډیمونو جوړېدو کار پيل شو.</p>
<p style="text-align: justify;">د دغه ولایت د کرنې، اوبولګولو او مالدارۍ ریاست د څرځایونو برخې مدیر عبدالکافي پژواک ته وویل چې د یادو چک ډیمونو کار د ملګرو ملتونو له نشهيي توکو او جرمونو سره د مبارزي دفتر (UNODC) په مالي او د ډاکار موسسې په تخنيکي همکارۍ پيل شو.</p>
<p style="text-align: justify;">نوموړي د جزئیاتو له ورکولو پرته وویل چې دغه پروژه به په نږدې راتلونکې کې بشپړه شي.</p>
<p style="text-align: justify;">هغه زياته کړه، یاد چک ډیمونه هر یو په پنځه جریبه ځمکه کې جوړېږي چې ۲۰۰ سوه متره اوږدوالی، ۱۰۰ متره سور او درې متره لوړوالی به ولري.</p>
<p style="text-align: justify;">عبدالکافي وویل چې د يادې پروژې په بشپړېدو سره به د کوچيانو او خلکو څارويو ته د څښاک پر اوبو سربېره، د مالچرونو او طبي بوټو د بېرته پيدا کېدو په برخه کې هم اسانتياوې رامنځته شي.</p>
