<p style="text-align: justify;">کابل (پژواک، ۱۲ چنګاښ ۱۴۰۱): جاپان له افغانستان سره په پراختيايي برخو کې ۱۴ میلیون امریکایي ډالر مرسته کوي او ناروې ویلي چې له کنګل حالته د افغانستان د شتمنۍ د ایستلو پلوي کوي.</p>
<p style="text-align: justify;">د افغانستان د بهرنيو چارو وزارت مرستيال وياند ضيااحمد تکل پر خپل ټويټر ليکلي چې د بهرنیو چارو سرپرست وزیر مولوي امیرخان متقي په دوحه کې د افغانستان لپاره د جاپان سفیر تاکاشي اوکادا سره کتلي دي.</p>
<p style="text-align: justify;">د سرچینې د څرګندونو له مخې، اوکادا ویلي چې هېواد یې غواړي له افغانستان سره د کرنې په ګډون په بېلابېلو پراختيايي برخو کې ۱۴ میلیون امریکایي ډالره مرسته وکړي.</p>
<p style="text-align: justify;">هغه ويلي چې جاپان له افغانانو سره بشري مرستې او نورې همکارۍ له سیاسي مسایلو سره نه تړي.</p>
<p style="text-align: justify;">د سرچینې د معلوماتو له مخې، متقي په دې کتنه کې ويلي: «ټوله نړۍ مسؤلیت لري چې د افغانستان د بیا ابادۍ لپاره د نوي افغان حکومت لاسنیوی او ملاتړ وکړي، تر څو وکولای شو د څلورو لسیزو جګړو ځپلی افغانستان ودان کړو.»</p>
<p style="text-align: justify;">دغهراز، تکل ليکلي چې متقي په دوحه کې د افغانستان لپاره د ناروې له سفیر اولي لینډمن سره هم کتلي او لینډمن ويلي چې له کنګله د افغانستان د شتمنۍ د ازادېدو پلوی دی.</p>
<p style="text-align: justify;">د امریکا متحده ایالتونو وروسته له هغه د افغانستان شاوخوا ۹ میلیارده امریکایي ډالره شتمني کنګل کړه چې تېر کال په زمري میاشت کې د افغانستان تېر حکومت له منځه ولاړ او اوسني حکومت یې ځای ونیو.</p>
<p style="text-align: justify;">د بهرنیو چارو وزارت سرپرست مولوي امیرخان متقي، د مالیې وزارت او مرکزي بانک له چارواکو سره قطر ته تللی او هلته یې له کنګل څخه د یادې شتمنۍ د ازادېدو په تړاو خبرې کړې دي.</p>
