اټلانټا (پژواک، ۶ زمری ۱۴۰۱): د امریکا د بهرنیو چارو وزیر انټوني بلینکن وایي، د افغانستان سرپرست حکومت له نړۍوالې ټولنې او افغانانو سره کړې ژمنې عملي کړې نه دي.
بلینکن دغه څرګندونې د زمري په ۶مه، په واشنګټن کې د افغان ښځو د حقونو په اړه د «افغانستان، امریکا مشورتي مېکانیزم» په نامه د یوې نوې ادارې د پرانیستلو پرمهال کړې دي.
دا غونډه د امریکا د بهرنیو چارو وزارت، د اتلانتیک شورا، د ښځو، سولې او امنیت په برخو کې د جورج ټاون انسټیټوت او سیسترهوډ اس ګلوبل انسټیټوت له لورې بلل شوې وه.
بلینکن د یاد میکانیزم د پرانیستلو په غونډه کې په خپلو خبرو کې د بشري حقونو د راپور پر اساس وویل چې د افغانستان سرپرست حکومت په سیستماتیک ډول د ښځو د ازاد تګ راتګ او نور حقونه محدود کړي دي.
هغه همدغه راز د افغان نجونو د تعلیم په اړه وویل: «دا سخته ده چې نجونې دې په کورونو کې ناستې وي، خو د نجونو وروڼه او د کاکا/ماما زامن دې تعلیم وکړي.»
د امریکا د بهرنیو چارو وزیر وویل: «طالبانو پر خپلو هغو ژمنو عمل نه دی کړی چې له نړۍوالې ټولنې او افغانانو سره کړې وې.»
خو د اسلامي امارت ویاند ذبیحالله مجاهد پخوا ویلي و چې د دوحې تړون ته ژمن دي او له خپل اړخه یې ټولې ژمنې عملي کړې دي.
د امریکا د بهرنیو چارو وزیر بلینکن د یاد میکانیزم په اړه په خپل ټویټر کې لیکلي دي: «ما د افغانستان لپاره د ښځو، نجونو او بشر حقونو په چارو کې د امریکا له ځانګړې استازې رینا امیري سره د امریکا-افغانستان مشورتي میکانیزم پرانیست. دا میکانیزم به امریکايي چارواکي نور هم په اغېزناک ډول له افغان ښځو او مدني ټولنو سره [په چارو کې] دخیل کوي چې د افغانستان لپاره زموږ د ګډ هدف ملاتړ وشي، هغه افغانستان چې باید خلک یې د اینده په اړه تصمیم ونیسي.»
هغه یو ځل بیا د افغانستان له سرپرست حکومته وغوښتل چې نجونو ته د ثانوي زدهکړو اجازه ورکړي.
Visits: 59
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن