خوست ښار (پژواک، ۱۷ زمری ۱۴۰۱): د افغانستان د سرپرست حکومت د پوهنې وزير نورالله منيب وايي چې په اطرافي سیمو کې د نجونو ښوونځيو د خلاصون پر وړاندې لوی خنډ کلتوري محدوديتونه دي.
نوموړي دا څرګندونې نن (د زمري ۱۷مه) خوست ته د خپل سفر پر مهال د رسنیو استازو ته وکړې.
هغه چې دغه ولایت ته یې د پوهنې وضعیت ښه کولو په تړاو سفر کړی و، رسنیو ته په خپلو خبرو کې وویل، سرپرست حکومت د نجونو له تعليم سره مخالفت نه لري او نه يې پر وړاندې شرعي ملاحظه لري خو يوازېنۍ ستونزه چې په دې برخه کې موجوده ده، کلتوري محدوديتونه دي.
هغه زیاته کړه: «په اطرافي سيمو کې خلک د نجونو له تعليم سره نه، بلکې له کور څخه د نجونو له وتلو سره حساسيت لري، په دې برخه کې د افغانانو کلتور ډېر حساس دی.«
د ده په خبره، سرپرست حکومت هڅه کوي ولس ته په دې برخه کې قناعت ورکړي او له شپږم ټولګي پورته د نجونو ښوونځي ژر پرانیزي.
هغه د نجونو د ښوونځیو د بیا خلاصون کره نېټه ونه ښوده خو یادونه یې وکړه چې په دې برخه کې په کار بوخت دي.
منیب په خپلو خبرو کې د ښوونځيو د ښوونیز نصاب په اړه وويل چې اوسنی نصاب په ډېرو برخو کې ترميم او اصلاح ته اړتيا لري خو تر هغه چې د حکومت اقتصادي ستونزې هوارېږي، همدا نصاب به تدریسېږي.
هغه د کتابونو د کمښت په اړه وويل چې لا هم ډېرو لرو سيمو ته کتابونه نه دي رسېدلي خو د دوی هڅه دا ده چې که ټول نه وي، ۶۰ سلنه زده کوونکو ته کتابونه ورسوي.
هغه وويل چې د تېرې ادارې له خوا د ۳۷ ميليون کتابونو د چاپ قرارداد شوی چې د هغو نيمايي برخه کتابونه دوی ښوونځيو ته رسولي او پر پاتې هم کار روان دی.
نوموړي د دې ترڅنګ یادونه وکړه چې ښوونکو ته د سرپناه برابرولو په برخه کې يې هڅې پیل کړې، له خيريه بنسټونو او مرستندويه بنسټونو سره په اړيکه کې دي، خو وايي تر دې دمه چا ورسره مرسته نه ده کړې.
منيب وويل، افغانستان په ټوله کې ۲۰ زره رسمي ښوونځي لري چې په دې کې ۹ زره ښوونځي د استفادې وړ نه دي، پنځه زره يې له سره ودانۍ نه لري او پاتې ۴ زره يې يا له سره ترميم ته اړتيا او يا نیمه کاره دي.
غړيYou need to subscribe to view the full article. Please login or register a new account.
