پلعلم (پژواک، ۱۷ وږی ۱۴۰۱): د لوګر په مرکز او ولسوالیو کې د دولتي روغتونونو مسوولین وايي، دغو روغتونونو ته د ناروغانو ورتګ د پخوا په پرتله دوه برابره ډېر شوی دی.
د مرکز پلعلم د نایب امینالله خان لوګري روغتون رییس ډاکتر صدیقالله ستانکزي پژواک خبري اژانس ته وویل، تېر کال دغه روغتون ته هره ورځ تر ۶۰۰ ناروغانو مراجعه کوله خو اوس دغه شمېر شاوخوا ۱۲۰۰ ناروغانو ته لوړ شوی دی.
هغه زیاته کړه: «د دولتي روغتونونو د مراجعینو کچه د پخوا په پرتله دوه برابره لوړه شوې ده، یو لامل یې اقتصادي ستونزې دي او بل لامل یې دا دی چې په دولتي روغتونونو د خلکو اعتماد لوړ شوی دی؛ زموږ غوښتنه له عامې روغتیا وزارت څخه دا ده چې د لوګر ولایت دولتي روغتونونو د کارکوونکو شمېر لوړ کړي او د اړتیا وړ درمل هم ورته برابر کړي.»
د محمداغې ولسوالۍ د شفیقالله لودین روغتون یوه مسوول ډاکټر خلیلالرحمن پژواک خبري اژانس ته وویل، په دغې ولسوالۍ کې هم دولتي روغتونونو ته د ناروغانو مراجعه ډېره شوې ده.
دی وايي، ډېر ناروغان د بد اقتصادي وضعیت له امله په خصوصي روغتونونو کې د درملنې توان نه لري نو ځکه دولتي روغتونونو ته مراجعه کوي.
هغه زیاته کړه: «زموږ غوښتنه له عامې روغتیا وزارت او مرستندویه ادارو دا ده چې دولتي روغتونونو ته اسانتیاوې برابرې کړي او د روغتیا برخې د ډاکترنو تنخواوې په خپل وخت ورکړي.»
د پلعلم د یوه خصوصي روغتون مسوول چې نه غواړي نوم یې یاد شي، پژواک خبري اژانس ته وویل، د پخوا په پرتله یې د ناروغانو شمېر سم نیمایي راکم شوی دی.
هغه زیاته کړه: «تېر کال مو د ورځې ۵۰ ناروغان درلودل، ولې اوس ۲۰ ته راکښته شوي دي او عواید مو دومره کم شوي چې ان د روغتون د یوې ورځې لګښت هم نه شي پوره کولای، لوی علت یې د خلکو کمزوری اقتصاد دی.»
د مرکز پلعلم په نایب امینالله خان لوګري روغتون کې یوه بستري ناروغ صدیقالله پژواک خبري اژانس ته وویل، د ولایت په کچه د خلکو اقتصاد خورا کمزوری شوی، له همدې امله خلک د اړتیا پر مهال دولتي روغتونونو ته مراجعه کوي.
نوموړي زیاته کړه، اوسمهال په یو شمېر دولتي روغتونونو کې د ګڼېګوڼې له امله ناروغان له پراخو ستونزو سره مخ دي او حتی د ځینو ناروغانو درملنه هم په سمه توګه نه کېږي.
بلخوا د لوګر ولایت د والي ویاند عمر منصور پژواک خبري اژانس ته وویل، د «اسلامي امارت» له واکمنېدو سره سم په عامې روغتیا ریاست کې مثبت بدلونونه راغلي او پخوانۍ ټولې ستونزې یې هوارې شوې دي.
هغه زیاته کړه، دولتي روغتونونو ته ځکه د خلکو ورتګ ډېر شوی چې روغتیاپالان یې د ناروغانو ښه درملنه کوي.
نوموړی وایي: «په لوګر کې به هیڅ داسې دولتي روغتون نه وي چې له ستونزو سره مخ وي، د ټولو روغتونونو ستونزې مو هوارې کړې دي او هره ورځ د مرکز پلعلم په ګډون په ټولو ولسوالیو کې ناروغانو ته غوره خدمات وړاندې کېږي؛ نو ځکه د دولتي روغتونونو د مراجعینو شمېر ډېر شوی دی.»
لوګر پلازمینې کابل ته نږدې ولایت دی چې د یوه ۳۰۰ بستریز او یوه ۱۰۰ بستریز روغتونونو په ګډون په مرکز پلعلم او شپږو ولسوالیو کې شاوخوا ۶۵ روغتونونه او روغتیایي کلینکونه یې خلکو ته روغتیایي خدمات وړاندې کوي.
GET IN TOUCH
NEWSLETTER
SUGGEST A STORY
PAJHWOK MOBILE APP