غزني کې یوه مور او څلور ماشومان یې په مرموز ډول وژل شوي

<p style="text-align: justify;">غزني (پژواک، ۲۳ وږی ۱۴۰۱): د غزني په زنخان ولسوالۍ کې یوه مور او څلور ماشومان یې په مرموز ډول وژل شوي او جسدونه یې په یوه څاه کې اچول شوي دي.</p>

<p style="text-align: justify;">پېښه تېره شپه ناوخته د یادې شوې ولسوالۍ په ګوډلو کلي کې شوې ده.</p>

<p style="text-align: justify;">د دغه ولایت د امنیې قوماندانۍ ویاند ابو خالد سرحدي پژواک خبري اژانس ته وویل، تېره شپه د غزني د زنخان ولسوالۍ په ګوډلو کلي کې یوه مور او د هغې څلور ماشومان زندۍ او وژل شوي دي.</p>

<p style="text-align: justify;">هغه زیاته کړه، وروسته د وژل شوې ښځې او د هغې د ماشومانو جسدونه یوې ژورې څاه ته غورځول شوي او بیا د ګاز سرخلاصې ډبه ور پسې اچول شوې څو خلک یې جسدونه ژر را و نه باسي.</p>

<p style="text-align: justify;">د ده په خبره، تر اوسه د پېښې لامل څرګند نه دی خو امنیتي کسان د پېښې په ځای کې دي او په اړه یې پلټنې پيل کړې دي.</p>

<p style="text-align: justify;">د زنخان ولسوالۍ د ګوډلو کلي یوه اوسېدونکي محمداسحاق کریمي پژواک خبري اژانس ته وویل، دا پېښه د دوی د ګاونډي (موسی) په کور کې شوې چې په خپله په سعودي عربستان کې مسافر دی.</p>

<p style="text-align: justify;">هغه زیاته کړه، تېره شپه نامعلوم کسان د یاد شوي کس کور ته ورغلي، د هغه مېرمن او څلور ماشومان - چې له ۳ تر ۷ کلونو عمرونه لري - وژلي دي، خو یو شپږ میاشتنی ماشوم یې په زانګو کې ورڅخه پاتې شوی دی.</p>

<p style="text-align: justify;">دی وايي، نه پوهېږي چې دغه کار به چا کړی وي، ځکه دغې کورنۍ له هیچا سره هیڅ راز ستونزه نه لرله.</p>

<p style="text-align: justify;">د ده په خبره، د موسی له کورنۍ سره لوی ظلم شوی، حکومت باید دا پېښه دقیقه توګه وڅېړی، عاملان یې پیدا کړي او تر ټولو سخته سزا ورکړي.</p>