جلالاباد (پژواک، ۳۱ وږی ۱۴۰۱): د ننګرهار ولايت د سينديزې حوزې رياست له لوري د دغه ولايت په شېرزادو ولسوالۍ کې د اوبو دوو کانالونو جوړولو چارې پيل شوې.
چارواکي وايي، د دغو رغنيزو پروژو لګښت د ملګرو ملتونو پرمختیايي ادارې (UNDP) له لوري ورکول کېږي چې موخه يې د بيارغونې ترڅنګ خلکو ته د کاري زمينې برابرول دي.
د ننګرهار ولايت د سينديزې حوزې رييس سيد فضل احد د وږي په ۳۱مه پژواک اژانس ته وويل، د دغه ولايت په شېرزادو ولسوالۍ کې د ملګرو ملتونو پرمختیايي ادارې د ١٢،٧ ميليون افغانيو په لګښت د دوو کانالونو جوړولو چارې پيل شوې.
دی وايي، دغه کانالونه ۱۱،۵ کيلومتره اوږدوالی لري او د جوړېدو په موده کې به يې خلکو ته د لنډمهال لپاره د کار زمينه هم برابره شي.
د سينديزې حوزې رييس وايي، په دغه پروژه کې ۱۷۸۰ کسانو ته د کار زمينه برابره شوې او په جوړيدو سره به په يادو سيمو کې ٢٢٠٠ جريبه ځمکه خړوبه شي.
د سيمې اوسېدونکي وايي، د دغو پروژو تطبيق سره به يې د اوبو ستونزه حل شي.
د شېرزادو ولسوالۍ د مرکيخېلو سيمې يوه اوسېدونکي جعفر عمر پژواک ته وويل، د دغو کانالونو رغول د سيمې د خلکو ډېره لويه اړتيا وه چې په جوړېدو سره به يې خلکو ته ډېرې اسانتياوې برابرې شي.
د سيندېزې حوزې رياست چارواکي وايي، ورته پروژه به نږدې وختونو کې د ننګرهار چپرهار ولسوالۍ کې هم پيل شي.
