<p style="text-align: justify;">شبرغان (پژواک، ۳ تله ۱۴۰۱): د جوزجان د پوهنې رياست په تېر يوه کال کې د ښوونځيو جوړولو لپاره د دغه ولایت د خلکو له خوا د څه باندې ٢٣ جريبه ځمکې د ورکړې خبر ورکوي او له خیریه او مرستندویه بنسټونو غواړي څو له دغه ریاست سره د ودانیو جوړولو په برخه کې مرسته وکړي.</p>
<p style="text-align: justify;">د یاد رياست د معلوماتو له مخې، دا مهال د جوزجان ولايت په ٤٠٧ ښوونځيو کې د ٢٥٩٦ ښوونکو له خوا شاوخوا ١٢٩زره زدهکوونکي پر زدهکړو بوخت دي چې د فعالو ښوونځیو له ډلې ۴۳ سلنه یې ودانۍ نه لري.</p>
<p style="text-align: justify;">د جوزجان د پوهنې رييس مولوي محمدطاهر جواد، د ښوونځیو د ودانیو نهشتون لويه ستونزه بولي او وايي، هڅه کوي چې د پوهنې وزارت او مرستندویه موسسو په همکارۍ د بې ودانۍ ښوونځيو لپاره ودانۍ جوړې کړي.</p>
<p style="text-align: justify;">هغه زياته کړه: «د دغه ولايت د اقچې، خانقاه او خواجه دوکوه ولسواليو اوسېدونکو خپله ٢٣ جريبه او ١١ بسوې شخصي ځمکه د ښوونځيو د جوړولو لپاره د دغه ولايت د پوهنې رياست ته سپارلې ده.»</p>
<p style="text-align: justify;">د یاد ولايت د پوهنې ریيس په وينا، دوى هڅه کوي چې د همکارو موسسو په مرسته پر يادو ځمکو د ښوونځيو لپاره د ودانیو جوړولو چارې پیل کړي.</p>
<p style="text-align: justify;">هغه وايي: «هغه ځمکې چې خلکو ورکړې، د پوهنې په رياست کې مو ثبت کړې دي... د ځمکې په ورکولو سره به د ښوونځيو لپاره ودانۍ جوړې شي او موږ به هم د خدمت کولو لپاره لا زياتې هڅې وکړو.»</p>
<p style="text-align: justify;">د جوزجان د اقچې ولسوالۍ اوسېدونکى محمديوسف حليمي وايي، له علم او پوهې سره د لېوالتيا او د اولادونو د باسواده کولو لپاره یې خپلې شخصي ځمکې د پوهنې ریاست ته ورکړې دي.</p>
<p style="text-align: justify;">هغه زياته کړه: «خلک ځکه خپلې ځمکې پوهنې ریاست ته ورکوي چې مخکې به زدهکوونکي په ازاده فضا او يا تر خيمو لاندې زدهکړې کولې چې د درس ویلو لپاره مناسب ځاى نه و او دغه اقدام د زدهکوونکو او نورو د هڅونې لپاره يو ښه ګام دى.»</p>
<p style="text-align: justify;">بلخوا په جوزجان کې د اکټیډ دفتر ولايتي مسوول انجنير امانالله امين وايي، په عام المنفعه پروژو کې د خلکو ونډه اړينه ده چې خلک په ډېرې لېوالتيا د ښوونځيو په جوړولو کې برخه اخلي.</p>
<p style="text-align: justify;">هغه زیاته کړه: «موږ د دې لپاره چې خلک له پروژې ښه ساتنه وکړي، دوی ته ونډه ورکوو، په پروژو کې د خلکو ونډه جبري غوندې ده چې باید برخه واخلي، په دې برخه کې د خلکو خوښه ده چې نغدې پیسې ورکوي او که کاریګر ورکوي او د اقچې له خلکو مننه کوم چې تل له دوی سره همکاري کوي.»</p>
<p style="text-align: justify;">د جوزجان د پوهنې رییس وايي، د ملګرو ملتونو د ماشومانو وجهي صندوق (یونیسف) په جوزجان کې د پوهنې لپاره د څه باندې دوه میلیونه افغانیو په لګښت د ۱۵ معیاري خیمو مرسته کړې ده.</p>
<p style="text-align: justify;">هغه زياته کړه، دغه خېمې چې هره يوه يې د ٣٠ زدهکوونکو د ځایولو ظرفيت لري، هغو ښوونځيو ته وېشل شوې چې ودانۍ نه لري.</p>
