<p style="text-align: justify;">اسعدآباد، فراه (پژواک، ۱۲ تله ۱۴۰۱): په کونړ کې ۹۰۰ او په فراه کې ۵۵۰ وزګارو کسانو ته چې ښځې هم پکې شاملې دي، د حرفوي زدهکړو زمینه برابره شوه.</p>
<p style="text-align: justify;">په فراه کې د «رازي» په نوم موسسې مسوول بریالي نصرت نن (د تلې ۱۲مه) پژواک خبري اژانس ته وویل، دوی د ۱۸ میاشتو لپاره ۵۵۰ وزګار او بېوزله ځوانانو ته د حرفوي زدهکړو او کار زمینه برابره کړې ده.</p>
<p style="text-align: justify;">ده زیاته کړه: «زموږ د زدهکړو هره دوره شپږ میاشتې ده چې په ۱۸ میاشتو کې د خیاطۍ زدهکړې، کولر، ټیلېفون او نورو شیانو ترمیم په برخو کې ټول ۵۵۰ شاګردان روزو.»</p>
<p style="text-align: justify;">نوموړي وویل چې د فراه په مرکز او پشترود ولسوالۍ کې فعالیت لري او هر مستحق شاګرد ته د اړوند کسب ټول وسایل هم وړیا ورکول کېږي.</p>
<p style="text-align: justify;">د یاد ولایت د اطلاعاتو او فرهنګ رییس مولوي عبدالحی سباوون وايي چې ځوانان حرفوي زدهکړو ته ډېره اړتیا لري.</p>
<p style="text-align: justify;">ده زیاته کړه: «زموږ په ټولنه کې بیوزلي اوغربت ډېر دی او موږ له هغو موسسو مننه کوو چې خلکو ته هم د کار زمینه برابروي او هم حرفوي زدهکړې ورکوي.»</p>
<p style="text-align: justify;">د یو بل خبر له مخې، د کونړ د کار او ټولنیزو چارو ریاست وایي چې په دغه ولایت کې یې تازه د بېلابېلو نړۍوالو او خیریه موسسو پرمټ، ۹۰۰ بېوزلو او اړو ښځو ته د خیاطۍ، مالدارۍ او چرګانو ساتنې په برخو کې د لنډمهالو مسلکي زدهکړو زمینه برابره کړې ده .</p>
<p style="text-align: justify;">سرچینه زیاتوي چې ښځې د ښځو په خدمت کې نړۍوالې موسسې یا Women for Women په مالي او تخنیکي همکارۍ یې د کونړ په څوکۍ، خاص کونړ، غازياباد، وټهپور ولسوالیو او مرکز اسعداباد کې مېرمنو ته د لنډمهاله مسلکي زدهکړو زمینه برابره کړې ده.</p>
<p style="text-align: justify;">د کونړ د کار او ټولنیزو چارو رییس ذبیحالله محسود پژواک ته وویل: «ښځه د ښځې په خدمت کې د نړۍوالې موسسې له لوري د کونړ په خاص کونړ او څوکۍ ولسوالۍ کې ۵۵۰ بېوزلو مېرمنو ته تازه د خیاطۍ، مرغدارۍ او مالدارۍ د هنر زدهکولو یو کلن پروګرام پېل شوی دی.»</p>
<p style="text-align: justify;">ده وویل چې په دغه پروګرام کې ښځو ته نه یوازې مسلکي مهارتونه ورښودل کېږي، بلکې د حسابدارۍ او ټولنیز ژوند په برخو کې نظري زدهکړې هم ورکول کېږي.</p>
<p style="text-align: justify;">نوموړی زیاتوي چې د مرکز اسعداباد په ګډون د کونړ په غازياباد او وټهپور ولسوالیو کې د شپول موسسې په مالي او تخنیکي همکارۍ هم د خیاطۍ زدهکړې اته میاشتنی پروګرام پیل شوی چې ۳۵۰ اړو او بېوزلو ښځو ته پکې د زدهکړې زمینه برابره شوې ده .</p>
<p style="text-align: justify;">نوموړی وایي، د مسلکي زدهکړو په دغو ټولګیو کې ښځو ته هره میاشت له ۱۰۰۰ تر ۹۹۰۰ افغانیو په ارزښت د خوراکي توکو مرسته کېږي .</p>
<p style="text-align: justify;">په ورته مهال، هغه ښځې چې په کونړ کې په بېلابېلو برخو کې پر مسلکي زدهکړو بوختې دي وایي، د کورني اقتصاد د ودې لپاره د حکومت او نړۍوالو موسسو دغه ډول پروګرامونه ګټور دي.</p>
<p style="text-align: justify;">د کونړ څوکۍ ولسوالۍ د چنیاري سیمې اوسېدونکې شغله وایي، هره میاشت ورته د مهارتونو د ښودلو ترڅنګ یوه اندازه نغده مرسته هم ورکول کېږي.</p>
<p style="text-align: justify;">د یاد ولایت د خاص کونړ ولسوالۍ اوسېدونکې پرمینه چې د چرګانو ساتنې په برخه کې زدهکړې کوي وايي، حکومت دې دغه ډول پروګرامونه لا ډېر کړي او لرو سیمو ته دې هم وغځوي .</p>
<p style="text-align: justify;">نوموړې وایي، اړتیا لیدل کېږي چې حکومت له مسلکي زدهکړو فارغو مېرمنو د تولید او پر لاس جوړو توکو ته د خرڅلاو مناسب بازار پیدا کړي .</p>
