کابل کې د چاپان سفیر د افغانستان له خلکو سره د خپل هېواد مرستو د دوام ډاډ ورکړ

کابل (پژواک، ۲۱ تله ۱۴۰۱): د چاپان سفیر د بهرنیو چارو وزارت له سرپرست سره په لیدنه کې په بېلابېلو برخو کې د افغانستان له خلکو سره د خپل هېواد مرستو او همکاریو د دوام ډاډ ورکړ.

د افغانستان د بهرنیو چارو وزارت ویاند عبدالقهار بلخي په خپله ټويټرپاڼه کې لیکلي، په کابل کې د جاپان سفیر تاکاشي اوکادا پرون د بهرنیو چارو وزارت له سرپرست مولوي امیرخان متقي سره ولیدل.

د سرچینې د معلوماتو له مخې، متقي په اقتصادي، د عوایدو راټولولو، له بهرنیو مرستو پرته د حکومت د بودجې د تصویب، له نشه‌یي توکو سره د مبارزې، د روږدو درملنې او بشري حقونو په برخو کې د افغانستان اسلامي امارت لاسته راوړنو په اړه خبرې وکړې.

سرچینه زیاتوي، د چاپان سفیر په بېلابېلو برخو کې د افغانستان له خلکو سره د خپل هېواد مرستو د دوام په اړه ډاډ ورکړ او د بشري حقونو په برخه کې یې پر لا ډېرې پاملرنې ټینګار وکړ.