کابل (پژواک، ۹ لړم ۱۴۰۱): افغانستان لپاره د امریکا متحده ایالتونو ځانګړي استازي او ډاکټر عبدالله د اوسنيو ستونزو د حل په موخه پر بينالافغاني خبرو ټينګار کړی دى.
د مخکېني حکومت د ملي پخلاينې شورا مشر ډاکټر عبدالله عبدالله پر خپل فېسبوک ليکلي چې د افغانستان لپاره د امریکا متحدو ایالتونو له ځانګړي استازي ټام ویست سره ټیلیفوني خبرې کړې دي.
هغه د افغانستان له خلکو سره د امریکا متحدو ایالاتو له بشردوستانه مرستو مننه کړې او زياته کړې يې ده: «دواړو لورو له شپږم ټولګي پورته د نجونو د ښوونځيو پرانیستل د افغانانو اړتیا او غوښتنه یاده کړه او ټینګار مو وکړ چې د اوسنیو ستونزو د حل او په هېواد کې د سراسري ثبات د تامین لپاره واقعي بینالافغاني خبرو اترو ته چې د ملي یووالي تحکیم او ملي مشارکت لامل شي، اړتیا ده.»
سرچینه زياتوي، په پای کې ویسټ له افغانانو سره د امریکا د ملاتړ له دوام څخه ډاډ ورکړ.
