<p style="text-align: justify;">کابل (پژواک، ۱۹ لړم ۱۴۰۱): د کابل امنیه قومانداني وايي، د امنیتي کمرو د نصبولو کمپاین کې تر اوسه د کابل ښار په ټولو څلورو لارو کې کمرې فعالې شوې او خلکو هم پر خپلو ۲۰۰۰ کورونو کمرې لګولې دي.</p>
<p style="text-align: justify;">د کابل امنیې قوماندانۍ وياند خالد ځدران نن پژواک خبري اژانس ته وویل، د کابل ښار په ځينو سيمو کې د کمرو د نصب په اړه د ګذر وکيلانو په مټ د کمرو د نصبولو کمپاين پيل شوی، خلکو ته د کمرو د اهميت په اړه ملعومات ورکول کېږي او سپارښتنه ورته کېږي چې کمرې نصب کړي.</p>
<p style="text-align: justify;">دی د خلکو له خوا پر خپلو کورونو د کمرو د نصب په اړه وایي: «داسې نه چې دا کار الزامي ده، نه؛ څوک يې چې وس لري، موږ ورته د کمرې اهمیت بيانوو، څو زړه ورته ښه کړي او کمره نصب کړي.»</p>
<p style="text-align: justify;">هغه وایي چې د تېرو څو اونیو کمپاین په لړ کې د کابل ښار د پنځلسمې امنیتي حوزې په مربوطاتو کې خلکو پر خپلو کورونو تر ۲۰۰۰ ډېرې کمرې نصب کړې دي.</p>
<p style="text-align: justify;">دی زياتوي: «د کابل ښار د پنځلسمې حوزې ډېرو خلکو په خپله خوښه پر خپلو کورونو کمرې نصب کړې دي؛ همدا شان په لومړۍ حوزه کې هم؛ د دې ترڅنګ د کابل امنیه قوماندانۍ د څلورلارو ټولې کمرې فعالې کړې او په هغو ځايونو کې چې مهم وي، نورې کمرې هم نصبوي.»</p>
<p style="text-align: justify;">هغه وایي: «کمرې په امنيتي چارو کې ډېر مهم رول لري، کوم ځای کې چې د ټکنالوژۍ په واسطه امنیت نیول شوی وي هلته جرم ته مجرم زړه نه ښه کوي، موږ ته د مجرم راتلل په ګوته کوي او د مجرم په پېژندګلوۍ کې مرسته کوي.»</p>
<p style="text-align: justify;">ده له کابل ښاريانو وغوښتل چې که وس یې لري د خپلو کورونو مخې ته امنیتي کمرې نصب کړي.</p>
