اټلانټا (پژواک، ۱۹ لړم ۱۴۰۱): په ملګرو ملتونو کې د امریکا د استازولۍ دفتر وایي، د افغانستان سرپرست حکومت د ښځو او نجونو پر حقونو ډول ډول محدودیتونه لګولي دي.
دغه څرګندونې په ملګرو ملتونو کې د امریکا د استازولۍ دفتر یوه غړي ډوګ بنچ د لړم په ۱۹مه، د دغه سازمان د ۷۶مې کلنۍ غونډې پرمهال د افغانستان په اړه یوې ځانګړې ناستې ته کړې دي.
هغه زیاته کړه، امریکا له افغانانو او په ځانګړې توګه افغان مېرمنو، نجونو، قومي او مذهبي ډلو سره چې له ګواښ سره مخامخ دي، خپل ملاتړ ته ژمنه ده .
د امریکا استازي وویل، په افغانستان کې د نوي سرپرست حکومت له راتګ سره د ښځو پر حقونو بېلابېل ډول محدودیتونه لګول شوي او د افغان ښځو هغه لاستهراوړنې یې چې په تېرو شلو کلونو کې یې د نړۍوالې ټولنې په ملاتړ درلودې، له ګواښ سره مخ کړي دي.
د هغه په وینا، په افغانستان کې د ملګرو ملتونو د بشري حقونو ځانګړي راپور ورکوونکي ریجارډ بنیټ د راپور له مخې، له افغانستان پرته هېڅ داسې بل هېواد نشته چې د ښځو او نجونو حقونه پکې په دومره چټکۍ سره له منځه تللي وي.
د امریکا استازي وویل چې له افغان ښځو او نجونو څخه د کار او زدهکړې حق اخیستل شوی او دوی په ازاده توګه نه شي ګرځېدلی.
هغه زیاتوي چې په افغانستان کې د داعش بریدونه ډېر شوي او په دې وروستیو کې تعلیمي او مذهبي مرکزونه او هزاره ټولنه هدف ګرځول شوي دي.
نوموړی وایي، که چېرې د افغانستان سرپرست حکومت غواړي چې قانوني بڼه او په نړۍواله ټولنه کې ریښتینی ځای ولري، باید د ښځو او نجونو حقوق بېرته ورکړي.
د ده په وینا، امریکا له افغانستان سره له تېر یوه کال راهیسې شاوخوا ۱،۱ میلیارد ډالر بشري مرستې کړې دي او له نورې نړۍوالې ټولنې یې هم وغوښتل چې له افغانستان سره خپلو بشري مرستو ته ادامه ورکړي.
د امریکا ځانګړي استازي وویل، دوی د یوه داسې میکانیزم د جوړولو ملاتړ کړی چې د افغانستان د مرکزي بانک کنګل شوې درې نیم میلیارد ډالر د افغانانو په ګټه وکارول شي، خو د افغانستان سرپرست حکومت به پرې واک ونه لري.
ده وویل چې امریکا د افغانستان او افغانانو راتلونکي ته ژمنه ده.
د افغانستان سرپرست حکومت تراوسه د امریکا د استازي څرګندونو ته غبرګون نه دی ښودلی، خو تر دې مخکې یې ویلي چې دوی د شریعت په رڼا کې ټولو ته حقونه ورکړي دي.
غړيYou need to subscribe to view the full article. Please login or register a new account.
