فراه کې د وچکالۍ له امله د انارو لسګونه باغونه وچ شوي

<p style="text-align: justify;">فراه (پژواک، ۳۰ لړم ۱۴۰۱): د فراه یو شمېر بڼوال وايي، د وچکالۍ له امله يې د انارو لسګونه باغونه وچ شوي دي.</p>

<p style="text-align: justify;">د دغه ولایت د مرکز اړوند «کهدانک» کلي اوسېدونکي جان اغا پژواک خبري اژانس ته وویل چې له یو کال راهیسې يې د وچکالۍ له امله په کلي کې د انارو لسګونه باغونه وچ شوي دي.</p>

<p style="text-align: justify;">ده وویل: «زموږ کلی د انارو پر کلي مشهور و خو له یو کال راهیسې د وچکالۍ له امله لسګونه باغونه وچ شوي او کلی اوس سپېره ډاګ ښکاري.»</p>

<p style="text-align: justify;">نوموړي زیاته کړه، د ژورو څاګانو کیندنې وس نه لري؛ له حکومت او خیریه بنسټونو د مرستې غوښتنه کوي.</p>

<p style="text-align: justify;">د یاد کلي یوه بل اوسېدونکي امید وویل: «زموږ په سیمه کې د وچکالۍ له امله د انارو ۹۰ سلنه باغونه وچ شوي او که حکومت دې ستونزې ته پاملرنه ونه کړي نو ښايي خلک نورو سیمو ته ګډه شي.»</p>

<p style="text-align: justify;">بلخوا د دغه ولایت د کرنې او مالدارۍ ریاست هم دا ستونزه مني، خو وايي وچکالي یوازې په فراه کې نه، بلکې په ټول هېواد کې راغلې ده.</p>

<p style="text-align: justify;">دغه ریاست وايي، یاده ستونزه يې له یو شمېر مرستندویه موسسو سره شریکه کړې او هیله ده چې په ځينو سیمو کې د اوبو لپاره ژورې څاګانې وکني.</p>

<p style="text-align: justify;">د فراه د کرنې او مالدارۍ امر مولوي عبدالغني عابد پژواک ته وویل، وچکالي عامه ده خو دوی د کهدانک کلي د انارو باغونو وچېدو په اړه له یو شمېر مرستندویه موسسو سره خبرې کړې او هڅه کوي چې د ستونزې حل په موخه خلکو ته ژورې څاګانې وکني.</p>

<p style="text-align: justify;"> د یادونې ده، د چاپېریال‌ساتنې ادارې معلوماتو له مخې، په وروستیو څو کلونو کې د هېواد په ځينو ولایتونو کې تر ځمکې لاندې د اوبو سطحه له ۲۰ تر ۴۰ مترو ټيټه شوې ده.</p>