د کابل والي ولسوالانو ته: په احتياط بايد قدم واخيستل شي، څو نظام له ننګونو سره مخ نه شي

کابل (پژواک، ۲۴ لېندۍ ۱۴۰۱): د کابل والي له ولسوالانو او نورو مسوولينو غوښتنه وکړه چې مجرمينو ته په خپله خوښه نه بلکې د اسلامي اصولو په چوکاټ کې سزا ورکړي.

دغه څرګندونې د کابل والي مولوي محمدقاسم خالد نن په کابل کې د دغه ولایت د ولسوالیو او یو شمېر نورو امنیتي ارګانونو له مسوولینو سره د امنیتي او ټولنیزو ستونزو په تړاو جوړې شوې غونډه کې وکړې.

هغه زیاته کړه: «والي هم دا شرعي مکلفیت لري، ولسوال هم دا شرعي مکلفیت لري، امنیه قوماندان او د استخباراتو رییس هم دا مسوولیت لري، که یو مجرم ته سزا ورکوو نو د شرعیت په چوکاټ کې به سزا ورکوو او د خپل طبعیت له مخې به چاته سزا نه ورکوو.»

نوموړي وویل: «په توقیف‌خانو کې کله کله یو غفلت پېښېږي او زمونږ او ستاسو بندیان له ستونزو سره مخ کېږي، دا زمونږ او ستاسو شرعي مسوولیت دی چې قاتل ونیول شي خو جزا به د قاضي د حکم له مخې ورکوو.»

د کابل والي وایي چې د اسلامي نظام پاېښت لپاره څلور شیان باید په پام کې ونیول شي، د ملت وحدت او یووالی، پر ولس شفقت او ترحم کول، بیت‌المال ته ډېره پاملرنه او د عوایدو په راټولولو او لګښت کې له احتیاطه کار اخیستل.

د ده په خبره: «عواید باید په ظلم، زور، رشوت او غلا یوه روپۍ هم بايد مرکزي بیت‌المال خزانې ته را نقل نه شي او هغه مشروع لارې چې شریعت او یا هم فقهاوو په کتابونو کې مونږ ته بیان کړي له هغو لارو به عواید بیت‌المال ته راجمع کوو.»

هغه دا هم وویل چې د بیت‌المال په لګښت کې دې له احتیاطه کار واخیستل شي او بې‌ځایه ونه لګول شي.

نوموړی وایي، په افغانستان مختلف قومونه ژوند کوي، دوی باید متحد وساتل شي. هغه له ولسوالانو غوښتنه وکړه چې د خلکو ستونزو ته دې پاملرنه وکړي، د اسلامي اصولو په رڼا کې دې یې حل کړي او هم دې پر ولس شفقت او ترحم وکړي.

خالد ټينګار وکړ چې د مشکوک کس په اړه دې لومړی باید څېړنې او وروسته د نيولو لپاره یې اقدام وشي.

نوموړي وویل: «اوس هم ستونزې شته دي، مونږ به ډېر په احتیاط سره قدم اخلو ترڅو داسې یو منفي حرکت په مونږ کې پیدا نه شي څو خدای ناخواسته دغه نظام له ننګونو سره مخ شي.»

د یادونې ده، محمدقاسم خالد تر دې وړاندې د سرحدونو او قبایلو چارو وزارت مرستيال و، خو دوې اونۍ وړاندې د کابل د والي په توګه وټاکل شو.