کابل (پژواک، ۲ مرغومی ۱۴۰۱): د الازهر پوهنتون مشر شیخ احمد الطیب په افغانستان کې د نجونو زدهکړو ځنډولو پر پرېکړې اندېښنه ښودلې او له افغان چارواکو يې غوښتي چې پر ياده پرېکړه بیاکتنه وکړي.
د افغانستان لوړو زدهکړو وزارت د ليندۍ په ۲۹مه اعلان وکړ چې په هېواد کې د نجونو لوړې زدهکړې تر بل امر پورې ځنډول شوې دي.
د وزارت په خبرتیا کې راغلي: «د هېواد ټولو دولتي او خصوصي پوهنتونونو ته خبر ورکول کېږي چې د ۱۴۴۳ هجري قمري کال د کابینې ۲۸مې ګڼې مصوبې پرېکړې له مخې، د اناثو تحصیل هم تر امر ثاني پورې معطل شو.»
دا په داسې حال کې ده چې د نجونو ښوونځیو له شپږم ټولګيو فعالیت د روان ښوونیز کال له پیله ځنډول شوی دی.
د سرپرست حکومت دغه کړنې له غبرګونونو سره مخ شوې دي.
د الازهر پوهنتون پر خپل ټويتر ليکلي چې د یاد پوهنتون مشر شیخ احمد الطیب په افغانستان کې له پوهنتون څخه د نجونو منع کول د اسلامي شریعت سره په ټکر کې عمل بللی او په دې پریکړه یې خواشیني ښودلې ده.
سرچینې د شیخ احمد الطیب له قوله ليکلي: «دا ټکان ورکوونکې پرېکړه باید د هېڅ مسلمان له خوا نه وای صادره شوې، دا تصمیم د شریعت خلاف او د قران کریم له بلنو سره په ټکر کې دی.»
ده پر د افغان چارواکو غږ کړی چې پر خپلې پرېکړې بیاکتنه وکړي او ویلي یې دي، دوی باید ټول په یاد ولري چې الله ته ورتلونکي دي او هغه مهال مقام څوک نه شي ژغورلی.
شیخ احمد الطیب مسلمانانو ته په خطاب کې ويلي، له زده کړو د نجونو محرومول په اسلام کې نشته.
خو د لوړو زده کړو سرپرست وزیر مولوي ندامحمد ندیم تېره شپه ملي ټلوېزیون سره د مرکې پرمهال له لوړو زده کړو څخه د اناثو د محرومولو په اړه د خپلې پرېکړې دفاع وکړه او ویې ویل، د نوي حکومت له راتګ څخه تر دې دمه یې پوهنتونونو کې د اصلاح لپاره صبر وکړ، خو دا چې دغه ستونزې حل نه شوې، نو د نجونو پر تحصیل یې تر بل امر پورې د بندېز پرېکړه وکړه.
هغه، له محرم پرته په لیلیو کې د نجونو د استوګنې او سفر، د شرعي حجاب نه مراعاتول، په پوهنتونونو کې د ښځینه او نارینه محصلینو نه جلاوالی او په تدریسي نصاب کې د ښځو د شان خلاف د ځینو رشتو موجودیت هغه څلور عمده لاملونه یاد کړل چې په وینا يې دوی اړ شول دغه پرېکړه وکړي.
د لوړو زده کړو سرپرست وزير ویلي، دوی له افغان ښځو او زده کړو سره ستونزه نه لري او هڅې روانې دي چې د ښځو د تحصیل لپاره د شریعت په رڼا کې لار پيدا شي.
هغه پر نړۍوالو غږ وکړ چې د افغانستان په داخلي چارو کې دې کار نه لري.
غړيYou need to subscribe to view the full article. Please login or register a new account.
