زابل کې پر امنیتي کسانو د یونیفورم وېش پیل شو

<p style="text-align: justify;">کلات (پژواک، ۱۰ مرغومی ۱۴۰۱): د زابل مرکز کلات او ولسوالیو پر امنیتي کسانو د یونیفورم وېش پيل شو.</p>

<p style="text-align: justify;">په دې اړه په مرکز کلات کې په امنیه قوماندانۍ کې جوړو شوو مراسمو ته د دغه ولایت امنیه قوماندان قاري صلاح الدین ایوبي وویل، د کورنیو چارو وزارت په لارښوونه یې په مرکز کلات او ولسوالیو کې ټولو پولیسو ته د نوي یونیفورم د وېش لړۍ پیل کړه.</p>

<p style="text-align: justify;">هغه زیاته کړه، له دې وروسته امنیتي کسان مکلف دي چې د دندې پر مهال یونیفورم واغوندي.</p>

<p style="text-align: justify;">دی وايي: «اسلامي پولیس، د پولیسو ځانګړي ځواکونه، سرحدي پولیس، ټرافیک پولیس او د اطفايې پولیس به خپل ځانګړی یونیفورم ولري.»</p>

<p style="text-align: justify;">ده له امنیتي ځواکونو وغوښتل چې د تالاشیو پر مهال له خلکو سره نېک چلند وکړي.</p>

<p style="text-align: justify;">د زابل والي مولوي قدرت الله ابوحمزه وویل، خلک له دوی هیلې لري څو چارې منظمې وي او دوی ته ښه خدمات وړاندې شي.</p>

<p style="text-align: justify;">هغه زیاته کړه، نوی یونیفورم به د امنیت په ټینګښت کې رول ولري او د جرایمو کچه به تر ډېره ټیټه شي.</p>

<p style="text-align: justify;">دا مهال د زابل په مرکز او ولسوالیو کې شاوخوا ۲۴۰۰ پولیس د امنیت ساتلو په دندو بوخت دي چې د چارواکو په وینا تر راتلونکو څو ورځو به ټول په یونیفورم سمبال شي.</p>