کابل (پژواک، ۲۰ مرغومی ۱۴۰۱): حکومتي مسوولين وايي، په ننګرهار او کندوز ولایتونو کې د وسلهوالو غلاوو په تور يوه اووه کسيزه او بله نهه کسيزه ډله نيول شوې ده.
د استخباراتو عمومي رياست په خپل ټوېټرپاڼه کې ليکلي: «د ننګرهار د استخباراتو ریاست مجاهدينو د یو لړ کشفي راپورونو پر اساس د دغه ولایت په بهسودو ولسوالۍ کې د وسلهوالو غلو اووه کسیزه ډله په داسې حال کې نیولې چې د مجاهدینو له نامه څخه په استفادې يې له یوه کور څخه په غلا بوخت وو.»
ياد رياست په همدې تړاو يوه ويډيو هم خپره کړې ده.
د کندهار د دامان ولسوالۍ اوسېدونکی قدرتالله په ياده ويډيو کې وايي: «موږ دلته جلالاباد ته راغلي وو، بهسودو ولسوالۍ کې په يوه کور کې پيسې وې، غوښتل مو چې هغه پېسې وباسو، کور ته چې داخل شو، هغه خلک مو وتړل، وروسته د ننګرهار د استخباراتو مجاهدين راورسېدل، موږ يې ګرفتار کړو.»
دغهراز د ننګرهار د چپرهار ولسوالۍ اوسېدونکی صدیقالله په ياده ويډيو کې وايي: «په بهسودو ولسوالۍ کې په يو کور کې پېسې وې، راخيستلې مو، استخباراتو راباندې چاپه ووهله.»
د بلخ اوسېدونکی پرويز چې په کابل کې اوسېږي او په نیول شوې ډله کې شامل دی، په ياده ويډيو کې وايي: «موږ له کابله راغلو بهسودو ته، یوه کور ته د غلا لپاره، په ياد کور کې وو چې د استخباراتو مجاهدينو موږ ګرفتار کړو.»
د يو بل خبر له مخې، د کندوز ولایت چارواکي وايي چې د کندوز – تخار لويېلارې په اوږدو ملا کريم سيمه کې يې د اووه ميليون افغانيو او ۵۰ زره امريکايي ډالرو د غلا په تور نهه کسان نیولي دي.
د کندوز امنیه قوماندان قاري بختیار معاذ وايي: «دغه نهه کسیزې ډلې اعتراف کړی چې پر صرافانو به يې لارې جوړولې، اوه ميليونه افغانۍ او ۵۰ زره ډالر يې له صرافانو اخيستي وو چې پېسې بېرته صرافانو ته ورکړل شوې او پر دوی به شرعي حکم جاري شي.»
د امامالدين په نوم یو صراف چې يادو کسانو ترې پیسې غلا کړې وې، وايي: «څو ورځې وړاندې د خاناباد ولسوالۍ د ملا کريم خوړ (سېل بر) کې یو شمېر غلو د امارت په جامه کې چکپاينټ جوړ کړی و، ۱۳۰ زره امريکايي ډالر يې رانه يووړل، مننه له قوماندان صيب نه چې زما پېسې یې بېرته را تسليم کړې.»
د يادونې ده، تر دې وړاندې هم يو شمېر هغه وسلهوال کسان نيول شوي چې د امنیتي کسانو له نوم څخه په استفادې يې خلک لوټل.
GET IN TOUCH
NEWSLETTER
SUGGEST A STORY
PAJHWOK MOBILE APP