<p style="text-align: justify;">کابل (پژواک، ۵ سلواغه ۱۴۰۱): د افغانستان د بهرنیو چارو وزارت په نیډرلینډ کې د يوه کس له لوري د قرانکریم د نسخې شکول او بېحرمتي غندلې او له دغه هېواده یې غوښتي څو دغه کس ته سزا ورکړي.</p>
<p style="text-align: justify;">د بهرنیو چارو وزارت پر خپله ټویټرپاڼه د یوې خبرپاڼې په خپرولو لیکلي: «د افغانستان اسلامي امارت د نیډرلینډ په هاګ ښار کې د يوه متعصب سياستوال له خوا د قرانکریم نسخې شکول او بېحرمتي کول پر سختو ټکو غندي.»</p>
<p style="text-align: justify;">په خبرپاڼه کې راغلي: «اسلامي امارت» د دغه هېواد پر حکومت غږ کوي چې یاد کس مجازات کړي او د سیاسي فعالیت جواز ترې واخلي څو د اسلام او مسلمانانو پر ضد په سیستماتیک ډول د تعصب او کرکې خپرولو مخنیوی وشي.</p>
<p style="text-align: justify;">دغه وزارت د اسلامي هېوادونو له مشرانو هم غوښتي چې د دغسې کړنو مخنیوي لپاره یو دریځ غوره کړي څو مسلمانان له خپل دینه په اغېزناکه توګه دفاع وکړای شي.</p>
<p style="text-align: justify;">څو ورڅې مخکې په سویډن کې هم د ترکیې ضد لاریونونو پر مهال د دغه هېواد یوه ښي اړخې سیاستوال د پولیسو په مخ کې د قرانکریم نسخې سوځولې وې.</p>
<p style="text-align: justify;">هغه وخت هم د افغانستان بهرنیو چارو وزارت په سويډن کې د قرانکریم سوځول او بېحرمتي پر سختو ټکو غندلې وه او له دغه هېواده یې غوښتي وو چې عامل ته یې سزا ورکړي.</p>
<p style="text-align: justify;">د ترکیې بهرنیو چارو وزارت هم ویلي وو چې د بیان ازادي تر چتر لاندې د اسلام ضد عمل ته- چې مسلمانان په کې په نښه او مقدساتو ته سپکاوی وشي- اجازه ورکول د منلو نه دي.</p>
