غزني کې د ترافیکي پېښې له امله درېیو کسانو ته مرګ‌ژوبله اوښتې

<p style="text-align: justify;">غزني ښار (پژواک، ۱۶ سلواغه ۱۴۰۱): د کابل- کندهار پر لویه‌لار د غزني د ګیلان ولسوالۍ په چرلي سیمه کې د یوې ترافیکي پېښې له امله یو کس مړ شوی او دوه نور ټپيان دي.</p>

<p style="text-align: justify;">د غزني د امنیې قوماندانۍ ویاند ابو خالد سرحدي پژواک خبري اژانس ته وویل، پېښه پرون ماښام ناوخته د یوه ټونس او ټېلري موټرو د ټکر له امله شوې ده.</p>

<p style="text-align: justify;">هغه زیاته کړه، په یاده پېښه کې د ټونس موټر له سپرلیو یو کس مړ دی او دوه نور ټپیان شوي چې ټپیان د درملنې لپاره د ګیلان ولسوالۍ روغتیايي مرکز ته لېږدول شوي دي.</p>

<p style="text-align: justify;">نوموړی وايي، پېښه د موټرچلوونکو د بې‌احتیاطۍ او ترافیکي اصولو نه مراعاتو له امله شوې ده.</p>

<p style="text-align: justify;">د یادونې ده، د کابل- کندهار لار د تېرو کلونو جګړو او باروړونکو موټرو د درانه وزن له امله سخته خرابه شوې چې وخت ناوخته ترافیکي پېښې په کې رامنځته کېږي.</p>