د ریاست‌الوزراء اقتصادي معاونیت: له بهرنیو ځواکونو پاتې پوځي اډې پر اقتصادي زونونو بدلېږي

<p style="text-align: justify;">کابل (پژواک، ۲۰ سلواغه ۱۴۰۱): د ریاست‌الوزراء اقتصادي معاونیت وایي، د اقتصادي پیاوړتیا په موخه به په هېواد کې له بهرنیو ځواکونو پاتې پوځي اډې پر ځانګړو اقتصادي زونونو بدلې شي.</p>

<p style="text-align: justify;">د ریاست‌الوزراء اقتصادي معاونیت پرون په خپله <a href="https://twitter.com/FDPM_AFG/status/1623268486075019264">ټویټرپاڼه</a> کې د یوه ویډیویي پیغام په خپرولو ویلي: «د اقتصادي پیاوړتیا په موخه په افغانستان کې له بهرنیو ځواکونو پاتې نظامي اډې پر ځانګړو اقتصادي زونونو بدلېږي.»</p>

<p style="text-align: justify;">سرچینه زیاتوي، د اقتصادي کمېسیون د پرېکړې پر اساس د صنعت او سوداګرۍ وزارت په مشرۍ ګډې کمېټې ته دنده سپارل شوې څو له بهرنیو ځواکونو څخه د پاتې نظامي اډو پر ځانګړو اقتصادي زونونو د بدلولو لپاره د موقعیت، مساحت، شته امکاناتو، د اړتیاوو مدیریت او عملي چارو د پیل په اړه هراړخیزه ارزونه وکړي او راپور یې له اقتصادي کمېسیون  سره شریک کړي.</p>

<p style="text-align: justify;">سرچینه وايي، یادې پوځي اډې د کابل ترڅنګ په پروان، کندهار، ننګرهار، هرات، بلخ او ځینو نورو ولایتونو کې دي چې په نږدې راتلونکي کې به پر ځانګړو اقتصادي زونونو بدلې شي.</p>

<p style="text-align: justify;">د سرچینې په وینا، دغه پوځي اډې پر لازمو امکاناتو سمبالې دي او د لومړنیو څېړنو پر اساس د ځانګړو اقتصادي زونونو لپاره مناسبې بلل شوې دي.</p>

<p style="text-align: justify;">د سرچینې د معلوماتو له مخې، ځانګړي اقتصادي زونونو جوړول د بهرنۍ پانګونې جلبولو، د صنعتي کېدو پر لور چټکو ګامونو اخیستو، په پراخه کچه کاري زمینې برابرولو او چټک اقتصادي پرمختګ لپاره په نړۍ کې یو منل شوی مېکانیزم دی.</p>