اټلانټا (پژواک، ۳۰ سلواغه ۱۴۰۱): د پاکستان د بهرنیو چارو وزیر ادعا کوي چې داعش د افغانستان سرپرست حکومت ته ستر ګواښ دی او وایي چې په کابل کې د نظام له بدلون وروسته په پاکستان کې ترهګريزې پېښې ډېرې شوې دي.
د پاکستان د بهرنیو چارو وزیر دا څرګندونې پرون (شنبه، د سلواغې ۲۹مه) د مونیخ امنیتي کنفرانس پر مهال کړې دي.
هغه زیاته کړې، د افغانستان مقاومت جبهه د سرپرست حکومت لپاره هیڅ ګواښ نه دی خو ټینګار یې کړی چې داعش د اسلامي امارت لپاره جدي ګواښ ګڼل کېږي.
دا په داسې حال کې ده چې د روسیې په مشرۍ د «ډلهییز امنیت» تړون لوی درستیز ادعا کړې وه چې د افغانستان په شمال کې د داعش سلګونه وسلهوال راټول شوي او دغه ډله د منځنۍ اسیا هېوادونو لپاره ګواښ ده.
خو د افغانستان سرپرست حکومت چارواکو تل ویلي چې داعش په افغانستان کې حضور نه لري او که له هر ځای سر پورته کړي، وبه ځپل شي.
د افغانستان د بهرنیو چارو سرپرست وزیر امیرخان متقي څو ورځې مخکې د افغانستان په شمال کې د داعش ډلې حضور په اړه د روسیې په مشرۍ د «ډلهییز امنیت تړون» د لوی درستیز څرګندونې رد کړې او ویې ویل چې هیڅوک باید افغانستان بدنام نه کړي.
د پاکستان د بهرنیو چارو وزیر بلاول بوټو زرداري په افغانستان کې رامنځته شوی وضعیت او د سرپرست حکومت کړنې د امریکا په مشرۍ د نړۍوالو ځواکونو د وتلو له امله بولي.
نوموړي یو ځل بیا ادعا کړې چې د دوی دښمن (اشاره یې تحریک طالبان پاکستان ته وه) په افغانستان کې دی، خو دوی به هیڅکله پر افغانستان برید ته زړه ښه نه کړي.
هغه زیاته کړې، نړۍواله ټولنه او د کابل حکومت هغو ګواښونو ته په ډېر جدیت نه ګوري چې دمګړۍ پاکستان ورسره مخ دی.
بلاول ویلي: «په کابل کې له بدلون وروسته په پاکستان کې ترهګریزې پېښې ډېرې شوې، ډېر وخت به پرې ونه لګي چې نورو سیمو ته هم ورسېږي.»
نوموړي ادعا کړې چې سختدریځې ډلې په افغانستان کې خورا همغږې دي او دا به وخت وغواړي څو دوی د افغانستان سرپرست حکومت قانع کړي چې د ترهګرو ډلو خلاف ګام پورته کړي.
د افغانستان سرپرست حکومت تر اوسه د پاکستان بهرنیو چارو د وزیر د یادو څرګندونو په اړه څه نه دي ویلي.
یادونه: په دې خبر کې د امریکا غږ او بي بي سي له راپورونو استفاده شوې.
غړيYou need to subscribe to view the full article. Please login or register a new account.
