بلخ کې پولیسو ته د یونیفورم وېش لړۍ پیل شوه

مزارشریف (پژواک، ٣ کب ۱۴۰۱): د بلخ په مرکز او یو شمېر ولسوالیو کې څه باندې درې ‌زره پولیسو ته د یونیفورم وېش لړۍ پیل شوه.

د بلخ امنیې قوماندانۍ ویاند محمداصف وزیري وایي چې د کورنیو چارو وزارت په امر د دغه ولایت د امنیه قوماندانۍ څه باندې درې‌ زره پولیسو ته نن د یونیفورم وېش لړۍ پیل شوه.

د هغه په وینا، ټول پولیس به د دندې پر مهال له ځانګړي یونیفورم څخه استفاده کوي، څو له عامو خلکو سره یې توپیر وشي.

په همدې حال کې، د امنیې قوماندانۍ د امنیت امر قاري عبدالحی عابد وایي چې تر دې وروسته به ټول پولیس خپلو دندو ته له یونیفورم سره حاضرېږي.

نوموړي وويل، که کوم پوليس يونیفورم ونه لري، خلک دې امنيتي مسوولين په جريان کړي څو يې مخنيوي وکړي.

همدارنګه د بلخ والي مولوي محمد داوود مزمل له پوليسو غوښتنه وکړه چې يونیفورم ته احترام وکړي او په ښه توګه د خلکو امنيت تامين کړي.

بلخوا پوليس هم دغه ځانګړي يونیفورم ته خوښ دي.

د محمد یوسف په نوم یوه پولیس پژواک اژانس ته وويل، پخوا به د امنیتي کس او عام وګړي ترمنځ توپیر نه کېده خو اوس چې پوليسو ته يونیفورم ورکړل شو نو دا ستونزه به ورسره حل شي.

په بلخ کې پولیسو ته داسې مهال د یونیفورم وېش لړۍ پيل شوه چې تر دې وړاندې د دغه ولایت اوسېدونکو له حکومته پولیسو ته د یونیفورم ورکړې غوښتنه کړې وه څو له عامو خلکو سره یې توپير وشي.