<p style="text-align: justify;">کندهار (پژواک، ۷ کب ۱۴۰۱): د کندهار په سپين بولدک ولسوالۍ کې د تېر حکومت پر مهال د زابل د والي بسمالله افغانمل پر موټر په داسې حال کې تېل پاشل شوي او اور وراچول شوی چې زوی او ورور یې هم په کې سپاره وو.</p>
<p style="text-align: justify;">چارواکي پېښه تاييدوي او وايي، چا ته زیان نه دی اوښتی او د موضوع په تړاو څلور کسان نیول شوي دي.</p>
<p style="text-align: justify;">د کندهار د والي ویاند حاجي زید پژواک خبري اژانس ته وویل، پېښه پرون مازدیګر شاوخوا پنځه بجې د سپین بولدک ولسوالۍ په زاړه مانده سیمه کې شوې ده.</p>
<p style="text-align: justify;">دی وايي، بسمالله افغانمل له خپل ورور او زوی سره په خپل فیلډر موټر کې چېرې روان و چې پر موټر یې تېل شیندل شوي او اور وراچول شوی دی.</p>
<p style="text-align: justify;">د هغه په خبره، په پېښه کې افغانمل، د هغه ورو او زوی ته زیان نه دی اوښتی خو موټر یې سوځېدلی دی.</p>
<p style="text-align: justify;">نوموړي زیاته کړه: «د لومړنیو معلوماتو له مخې، په پېښه کې د بسمالله افغانمل مدعیان لاس لري چې له ده سره د دوکانونو ملکیت پر سر دعوه کې دي، په دې تړاو څلور کسان نیول شوي او پلټنې ورڅخه پیل شوې دي.»</p>
<p style="text-align: justify;">د سپین بولدک یوه اوسېدونکي احمدضیاء هم پژواک خبري اژانس ته وویل چې د بسمالله افغانمل او ځینو کسانو ترمنځ د دې ولسوالۍ په بازار کې د یو شمېر دوکانونو ملکیت پر سر دعوه وه چې د محکمې د پرېکړې له مخې، بسمالله افغانمل ته سپارل شوي وو.</p>
<p style="text-align: justify;">هغه زیاته کړه: «دا چې دعوه بسمالله افغانمل ګټلې ده نو زما په ګومان هغه خلک اوس دی نه پرېږدي.»</p>
<p style="text-align: justify;">په خپله بسمالله افغانمل له پېښې څو ساعته وروسته پر خپله فېسبوکپاڼه لیکلي چې له یوې بدې پېښې روغ وتلی.</p>
<p style="text-align: justify;">هغه لیکلي: «د لوی او مهربان خدای په فضل او مهربانۍ له يوې بدې پېښې بچ شوم، الحمدالله زه، ورور او زوی مې روغ او جوړ يو.»</p>
