<p style="text-align: justify;">کابل (پژواک، ۹ کب ۱۴۰۱): په اروزګان کې له ۴۲۸۴ بېوزلو کورنیو سره د خوراکي توکو او نغدو پیسو، په میدان وردګو کې له ۵۱۳ بېوزلو کورنیو سره د نغدو پيسو مرسته وشوه؛ همداراز په فراه کې پر ۲۵۲۰ اړو کورنیو د خوراکي توکو د وېش لړۍ پيل شوه.</p>
<p style="text-align: justify;">د اروزګان د والي ویاند احسانالله حماس پژواک خبري اژانس ته وویل، د کډوالۍ نړۍوال سازمان/ IOM له لوري په مرکز ترینکوټ کې له ۳۱۰۸ او په چنارتو ولسوالۍ کې له ۳۰۳ هغو کورنیو سره د نغدو پیسو مرسته وشوه چې د تېرو کلونو د جګړو له امله بېځایه شوې وې او په بد اقتصادي وضعیت کې یې ژوند کاوه.</p>
<p style="text-align: justify;">هغه زیاته کړه، هرې کورنۍ ته ۱۸ زره ۸۰۰ افغانۍ ورکړل شوې څو خپلې لومړنۍ اړتیاوې ورباندې پوره کړي.</p>
<p style="text-align: justify;">نوموړی وايي، د دغه ولایت په چورې، چارچینو او خاص اروزګان ولسوالیو کې بیا د خوړو نړۍوال پروګرام/ WFP له لوري له ۸۷۳ اړو او بېوزله کورنیو سره د خوراکي توکو مرسته وشوه چې هرې کورنۍ ته ۱۵۰ کیلوګرامه اوړه، ۱۸ کیلوګرامه دال، ۱۵ لېټره غوړي، یو کیلوګرام مالګه او یوه اندازه د مېندو او ماشومانو د تقویې خواړه ورکړل شول.</p>
<p style="text-align: justify;">دغه راز د میدان وردګو په جلریز ولسوالۍ کې له ۵۱۳ بېوزلو کورنیو سره نغدي مرسته وشوه.</p>
<p style="text-align: justify;">د یاد ولایت پېښو ته د رسېدنې رییس مولوي فیضالله جلالي پژواک خبري اژانس ته وویل چې یاده نغدي مرسته د ډنمارک د کډوالو موسسې له خوا وشوه او هرې کورنۍ ته ۲۹۰۰۰ افغانۍ ورکړل شوې.</p>
<p style="text-align: justify;">د یو بل خبر له مخې، د خوړو نړۍوال پروګرام د فراه په پشترود ولسوالۍ کې له ۲۵۲۰ اړو کورنیو سره د خوراکي توکو د وېش لړۍ پيل کړه.</p>
<p style="text-align: justify;">د دغه ولایت د اطلاعاتو او فرهنګ رییس مولوي سباوون پژواک خبري اژانس ته وویل، دا مرسته د ټولنې پياوړتیا موسسې له خوا وېشل کېږي چې هرې کورنۍ ته ۵۰ کیلوګرام اوړه، پنځه لېتره غوړي، ۳۰ پاکټه د ماشومانو خواړه او شپږ کیلوګرام نخود ورکول کېږي.</p>
