<p style="text-align: justify;">کندهار (پژواک، ۹ کب ۱۴۰۱): په کندهار کې د سېلاب خیریه بنسټ له لوري د هغه ۵۰ جوړو د واده یوځايي مراسم ترسره شول چې د اقتصادي ستونزو له امله یې په خپل لګښت دغه مراسم نه شوای جوړولای.</p>
<p style="text-align: justify;">په یادو مراسمو کې د ۵۰ جوړو (زومانو او ناویانو) سلګونو خپلوانو او دوستانو ګډون کړی وو او دغه مراسم یې په خوښۍ ونمانځل.<img class="alignleft wp-image-520756 " src="https://pajhwok.com/wp-content/uploads/2023/02/عروسی-دسته-جمعی-در-کندهار-1-1024x768.jpg" alt="" width="450" height="338" /></p>
<p style="text-align: justify;">د سېلاب خیریه بنسټ مشر سیداحمد سېلاب پژواک خبري اژانس ته وویل، نن د کندهار ښار د ودونو په یوه خصوصي سالون کې د ۵۰ ځوانانو د ودونو ډلهییز مراسم جوړ شوي وو چې ولورونه یې ادا کړي وو خو د واده د مراسمو جوړولو وس یې نه درلود.</p>
<p style="text-align: justify;">هغه زیاته کړه، د ودونو لپاره د یوځايي مراسمو له جوړولو یې موخه دا ده چې له دې لارې د لوړ ولور، ناوړه او بېځایه لګښتونو مخنیوی وکړي.</p>
<p style="text-align: justify;">نوموړی وايي، ډېر ځوانان د ولور او واده لګښت پوره کولو لپاره پر قاچاقي لارو نورو هېوادونو ته ځي او یا هم ډېرو نورو ناوړه کارونو ته مخه کوي چې دا د ځوانانو لپاره ډېر لوی زیان دی.</p>
<p style="text-align: justify;">هغه وویل: «لوړ ملا ماتوونکي ولور ځوانان پر قاچاقي لارو تګ او نورو ناوړه کړنو ته اړ کړي دي، زموږ هدف دا دی چې لوړ ولور او نور ناوړه رواجونه له منځه یوسو څو ځوانان پرته له کومو ستونزو ودونه وکړي.»</p>
<p style="text-align: justify;">سېلاب وایي، د دغو ۵۰ جوړو کورنیو ته یې د سېلاب خیریه بنسټ له لوري د واده مراسمو د لګښت ترڅنګ جامې، لوښي او د اړتیا وړ نور توکي هم ورکړل شول.</p>
<p style="text-align: justify;">له یادو ۵۰ ځوانانو ډېرې هغه کسان دي چې له تېرو اتو یا لسو کلونو راهیسې یې ودونه پاتې وو، خو له ډلې یې ګلمحمد بیا هغه کس دی چې د کوژدې یې شپاړلس کاله تېر شوي او دی دا مهال ۵۵ کلن دی.</p>
<p style="text-align: justify;">نوموړی وايي، که د ودونو په دغو مراسمو کې یې نوم نه وای لیکل شوی، واده به یې ښايي نور هم ځنډېدلی وای.</p>
<p style="text-align: justify;">هغه زیاته کړه: «ما ته یې ښځه رابخښلې وه خو د واده وس مې نه درلود، نو ځکه دا شپاړس کاله پاته و، نو اوس خوشحاله یم چې خدای ج مې دا مشکل حل کړ.»</p>
<p style="text-align: justify;">فریداحمد بیا هغه ځوان دی چې وايي، واده یې د لوړ ولور او بېروزګارۍ له امله له تېرو اوو کلونو راهیسې پاتې و.</p>
<p style="text-align: justify;">هغه غوښتنه کوي چې خلک باید لوړ ولور وانه خلي، ځکه دوی دوستي کوي خو کله چې بیا خسر خپل زوم ته ډېر لوړ ولور ټاکي دا داسې معنا لري لکه له هغه سره چې دښمني کوي.</p>
<p style="text-align: justify;">هغه وویل: «کله چې ولور ډېر وي نو بیا سړی هر کار ته مجبورېږي، اوس کارونه نشته، بېکاري ده، خو خسران باید یو څه فکر وکړي، کله چې یو ځوان کلونه کلونه خواري وکاږي او بیا واده وکړي نو د هغه خسر به بیا د ده کور ته په کومو سترګو ورځي.»</p>
<p style="text-align: justify;">د یوه زوم مور چې له ډېرې خوښۍ ژاړي وایي، د ژوند تر ټولو لوی ارمان يې پوره شو چې د زوی واده یې کېږي.</p>
<p style="text-align: justify;">د هغې په خبره، همدا یې یوازنی زوی و چې واده یې د غربت له امله پاتې و او اوس یې د واده د مراسمو لپاره د موټر د کرایې پیسې هم نه لرلې.</p>
<p style="text-align: justify;">هغې وویل: «ما دومره خوارۍ او تکلیفونه پر ځان وړي دي چې حد یې نشته، د بل د کور کارونه مې کړي دي چې زه دغه د زوی ولور ادا کړم، اوس چې یې واده وشو تر دې لویه خوشحالي زما لپاره نشته.»</p>
<p style="text-align: justify;">هغه غوښتنه کوي چې خلک باید د یوه او بل کورنیو او اقتصادي وضعیت ته وګوري او پر خپلو زومانو ډېر ولور کښېنږدي.</p>
<p style="text-align: justify;">د یوه زوم پلار عصمتالله هم وایي، خلک دې له ډېر ولوره ډډه وکړي، ځکه همدا د ډېر ولور پایله ده چې ځوانان له واده مخکې زاړه شي یا هم ناوړه کارونو ته مخه کړي.</p>
<p style="text-align: justify;">خلک وایي، دا چې په افغانستان کې اوسمهال ولور تر ډېره د پخوا برعکس د کلدارو پر ځای په افغانیو ټاکل کېږي، نو لا یې هم اندازه زیاته شوې او ډېرې کورنۍ له زوم څخه له څلور سوه زره افغانۍ کم ولور نه غواړي چې له دې امله ځوانان مسافرۍ او سختو کارونو ته اړ کېږي.</p>
