<p style="text-align: justify;">[restrict paid="true"]</p>
<p style="text-align: justify;">پارون، کلات (پژواک، ۱۷ کب ۱۴۰۱): په زابل او نورستان ولایتونو کې د درېیو ترافیکي پېښو له امله دوه کسان مړه او نهه نور ژوبل شوي دي.</p>
<p style="text-align: justify;">د زابل د امنیې قوماندانۍ ویاند ذبیحالله جوهر پژواک خبري اژانس ته وویل چې نن مازیګر د مرکز کلات په خرواریانو سیمه کې د دوو موټرسایکلونو د ټکر له امله درې کسان ټپیان شوي دي.</p>
<p style="text-align: justify;">نوموړی زیاتوي، دویمه ترافیکي پېښه د یاد ولایت يه سیوري ولسوالۍ کې د مازدا او موټرسایکل د ټکر له امله رامنځته شوې چې په کې یو کس مړ او بل ټپي شوی دی.</p>
<p style="text-align: justify;">د هغه په وینا، د دواړو پېښو ټپیان د سیمې نږدې روغتیایې مرکزونو ته لېږدول شوي او تر درملنې لاندې دي.</p>
<p style="text-align: justify;">د زابل د عامي روغتیا رییس ډاکټر میرویس افغان پژواک خبري اژانس ته وویل، له یادو دواړو ترافیکي پیښو څخه ولایتي روغتون ته درې ټپیان او د یوه کس جسد راوړل شوی چې په خبره یې، د دوو ټپیانو روغتیایی حالت ښه دی، خو د یوه روغتیایې حالت د ډاډ وړ نه و او د درملنې په موخه کندهار ته ولېږدول شو.</p>
<p style="text-align: justify;">د یو بل خبر له مخې، د نورستان ولایت په کامدېش ولسوالۍ کې د یوه ډاټسن د چپه کېدو له امله یو کس مړ او پنځه نور ټپیان شوي دي.</p>
<p style="text-align: justify;">د نورستان د والي ویاند سیفالدین لټون پژواک ته وویل، یاده پېښه د کامدېش ولسوالۍ په اګاڅي سیمه کې رامنځته شوې ده .</p>
<p style="text-align: justify;">د لټون په خبره، ياد موتر د کونړ ولایت له ناړۍ ولسوالۍ څخه برګمټال ولسوالۍ ته روان و چې په کامدېش ولسوالۍ کې له خپل مسیره اوښتی او سیند ته لوېدلی دی .</p>
<p style="text-align: justify;">هغه زیاته کړه چې په دې پېښه کې یو کس مړ او پنځه نور ژوبل شوي دي.</p>
<p style="text-align: justify;">[/restrict]</p>
