<p style="text-align: justify;">مزارشریف (پژواک، ۱۷ کب ۱۴۰۱): د ریاستالوزرا مرستیال مولوي عبدالسلام حنفي وایي چې د قوشتیپې کانال چارې به له ټاکلي وخت مخکې بشپړې شي.</p>
<p style="text-align: justify;">د ریاستالوزا لومړی مرستیال ملا عبدالغني برادر او د دغه ریاست دویم مرستیال مولوي عبدالسلام حنفي چې له یوه مل پلاوي سره یې د قوشتیپې له کاناله لیدنه وکړه، دواړو چارواکو د یاد کانال پر ژر بشپړېدو ټینګار وکړ.</p>
<p style="text-align: justify;">ملا عبدالغني برادر وويل چې حکومت د قوشتیپې کانال د چارو بشپړولو پوره هوډ لري او دغه پروژه به سر ته رسوي.</p>
<p style="text-align: justify;">هغه دغه راز زیاته کړه چې ګاونډي هېوادونه دې اندېښنه نه کوي؛ ځکه دغه کانال یوازې د دې لپاره جوړېږي، څو افغانستان خپله برخه اوبه له امو سینده راوګرځوي.</p>
<p style="text-align: justify;">په همدې حال کې مولوي عبدالسلام حنفي وایي چې د قوشتیپې کانال چارې به له ټاکلي وخت وړاندې بشپړې شي او دا مهال یې هم چارې په چټکۍ سره روانې دي.</p>
<p style="text-align: justify;">د نوموړي په وینا، دغه کانال ۲۸۵ کیلومتره اوږدوالی، ۱۵۲ متره پلنوالي او ۸،۵ متره ژوروالی لري، چې د لومړي فاز چارې به یې د راتلونکي کال تر زمري میاشتې بشپړې شي.</p>
<p style="text-align: justify;">هغه وایي، د دې پروژې په بشپړېدو سره به افغانستان د غله دانو له اړخه ځان بسیاینې ته ورسېږي او هم به نورو هېوادونو ته صادرات ولري.</p>
<p style="text-align: justify;">بلخوا، د ملي پراختیا شرکت ريیس عبدالرحمن عطاش وایي چې د قوشتیپې کانال د لومړي فاز چارې به د راتلونکي کال تر زمري میاشتې بشپړې شي چې دا مهال یې چارې ۵۸ سلنه پر مخ تللې دي.</p>
<p style="text-align: justify;">هغه زیاتوي، د دغه کانال لومړی فاز ۱۰۸ کیلومتره اوږدوالی لري چې ۱۶ میلیارد او ۶۰۰ میلیون افغانۍ بودجه ورته اختصاص شوې او سږ کال یې ۸ میلیارد افغانۍ بودجه مصرف شوې، راتلونکي کال کې به ۸ میلیارد او ۶۰۰ میلیون افغانۍ نورې هم پر دغه کانال مصرف شي.</p>
<p style="text-align: justify;">عطاش دغه راز وایي، د کانال شاوخوا ځمکو د وېش لپاره دا مهال کوم پلان نه لري او د ځمکو وېش چارې به یې د کانال له بشپړېدو وروسته پیل شي.</p>
<p style="text-align: justify;">د ملي پراختیا شرکت مسوولینو په وینا، دا مهال په دغه کانال کې په ۹۷ ګروپونو کې ۳۰۰ شرکتونه، ۴۰۰۰ ماشینري او له ۶۵۰۰ څخه ډېر کسان پر کار بوخت دي.</p>
