اټلانټا (پژواک، ۱۳ وری ۱۴۰۲): د بریتانیا بهرنیو چارو وزارت ويلي، په افغانستان کې یې درې وکړي د سرپرست حکومت له خوا بندیان دي.
د (پرسیډیون شبکې) په نوم یوه بشردوستانه سازمان بيبيسي ته ویلي چي یاد کسان په تېره جنورۍ میاشت کې نیول شوي دي.
سرچینې زیاته کړې، د یادو کسانو له ډلې یو کوین کورنل نومېږي چې ۵۳ کاله عمر لري، خو د دوو نورو نیول شوو کسانو هویت نه دی په ډاګه شوی.
د راپورونو له مخې، کورنل او دویم کس د جنورۍ په ۱۱مه نیول شوي او درېیم بیا ورپسې څو ورځې وروسته نیول شوی دی.
خو تر اوسه یې په اړه نور معلومات نه دي خپاره شوي.
د بریتانیا بهرنیو چارو وزارت د دغه خبر د پخلي ترڅنګ ویلي، دوی هڅه کوي چې له دغو کسانو سره اړیکې ټینګې کړي.
(پرسیډیوم نټورک) یو نادولتي بشردوستانه سازمان دی چې مرکز یې په بریتانیا کې دی او د کړکېچ په برخو کې فعالیت کوي؛ دغه سازمان د تاوتریخوالي کمولو او بېوزلۍ کې سیاستوالو ته د لارو چارو موندلو په اړه سلا مشورې ورکوي.
د راپورونو له مخې، دغه کسان د غیرقانوني وسلو ساتلو په تور نیول شوي، خو نیول شوو ته نږدې کسانو ویلي چې هغوی له کورنیو چارو وزارته د وسلو ساتلو جواز درلود.
تر اوسه د افغانستان سرپرست حکومت په دې اړه څه نه دي ویلي.
Views: 143
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن