د پنجشېر پوهنې ریاست کې اورلګېدنې درې‌نیم میلیون افغانۍ زیان اړولی

پاراخ (پژواک، ۲۴ وری ۱۴۰۲): د پنجشېر د پوهنې ریاست مسوولین وایي، تېره شپه د برېښنا شارټۍ له امله د دغه ریاست د ودانۍ یوه برخه سوځېدلې چې درې نیم میلیون افغانۍ زیان یې اړولی دی.

د پنجشېر د پوهنې رییس غلام ایشان حماس له پژواک سره په خبرو کې وویل، دغه اورلګېدنه تېر ماښام ۶:۴۰ دقیقې د دغه ولایت د پوهنې ریاست په ودانۍ کې رامنځته شوه او دوه ساعته یې دوام وکړ.

هغه په یاد ریاست کې د اورلګېدنې لامل د برېښنا شارټي او د دوام لامل یې د اطفایې پر وخت نه رسېدنه وبلله.

حماس وویل چې د مخابرې (ټکنالوژۍ) خونه په بشپړه توګه سوځېدلې او دوه نورې خونې قسماً تخریب شوې دي.

د یادونې ده، د ۱۴۰۲ کال په لومړیو کې هم د یاد ولایت د حصه اول ولسوالۍ د هلکانو په دهن ریوت ښوونځي کې د یوې ګازډبې چاودنې له امله اورلګېدنه رامنځته شوې وه چې ښوونځی یې قسماً تخریب کړی و.