جلالاباد (پژواک، ۳۱ وري ۱۴۰۲): د ننګرهار ولايت په مومندرې ولسوالۍ کې د ترافيکي پېښې له امله د يوې ښځې په ګډون څلور کسان ټپيان شوي دي.
چارواکي وايي، پېښه د جلالاباد – تورخم پر لويه لار د موټرچلوونکي د بېاحتياطۍ له امله شوې ده.
د ننګرهار امنيې قوماندانۍ وياند عبدالبصير زابلي پژواک خبري اژانس ته وويل، ياده پېښه پرون د تورخم – جلالاباد پر لويه لار د مومندرې ولسوالۍ اړوند په ډکې سيمه کې د يوه ټوډي موټر چلوونکي بېاحتياطۍ له امله شوې ده.
هغه زياته کړه، موټر له عمومي سړک ښکته غورځېدلی چې له امله يې دوه نارينه، يوه ښځه او يو ماشوم ټپيان شوي دي.
د هغه په وينا، د پېښې ځای ته د شاهراه ټولي او د يادې ولسوالۍ مسوولينو ځانونه رسولي او ټپيان يې مومندرې ولسوالۍ روغتون ته لېږدولي دي.
Visits: 476
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن