<p style="text-align: justify;">پارون (پژواک، ۲۳ غویی ۱۴۰۲): د نورستان چارواکي وایي، د دغه ولایت په نورګرام ولسوالۍ کې د یوه موټر چپه کېدو پېښه کې یو کس مړ شوی او څلور نور ټپیان دي.</p>
<p style="text-align: justify;">د نورستان د والي وياند سيفالدين لټون ياده پېښه تاییدوي او وايي، په دې پېښه کې يو کس مړ او څلور نور ټپيان شوي چې په خبره یې، ټپيان د لغمان ولايتي روغتون ته لېږدول شوي او د دوو کسانو حالت نازک دى .</p>
<p style="text-align: justify;">خو د دواب- نورګرام د لارې يوه موټرچلوونکي حکيمالله پژواک خبري اژانس ته وویل چې ياده پېښه تېره ورځ مازيګر مهال د نورګرام ولسوالۍ په سنګ پل سيمه کې د یوه ډاټسن موټر چپه کېدو له امله رامنځته شوه او پکې دوه کسان مړه او درې نور ټپیان شوي دي.</p>
<p style="text-align: justify;">نورستان د هېواد په ختیځ کې هغه ولايت دى چې سړکونه يې خام دي او ډېر وخت پکې ورته پېښې رامنځته کېږي؛ نږدې دوه مياشتې وړاندې د یادې سيمې په ګاونډ کولتن دره کې د يوه موټر چپه کېدو پېښه کې څلور کسان مړه او د ښځو او ماشومانو په ګډون اته نور ټپيان شوي وو.</p>
