کابل (پژواک، ۲۴ غویی ۱۴۰۲): د قطر لومړي وزیر کندهار ته له سفر وروسته د افغانستان وروستیو پرمختګونو او دوه اړخیزو اړیکو په اړه د امریکا بهرنیو چارو له وزیر سره خبرې کړې دي.
د قطر بهرنیو چارو وزارت پر خپلې ټوېټرپاڼې لیکلي چې لومړي وزیر او د بهرنیو چارو وزیر محمد بن عبدالرحمن الثاني تېره شپه ناوخته د امریکا بهرنیو چارو له وزیر انټوني بلېنکن سره د قطر او امریکا دوه اړخیزو اړیکو او په افغانستان کې د وروستیو پرمختګونو په اړه ټیلېفوني خبرې کړې دي.
په ورته وخت کې د امریکا بهرنیو چارو وزارت هم په یوه اعلامیه کې ویلي چې بلېنکن په دې خبرو کې له افغانستان سره د قطر مرستې ستایلې او د هغو پر دوام یې ټینګار کړی دی.
د یادونې ده، د قطر لومړي وزیر وړمه ورځ د دغه هېواد د استخباراتو له رییس سره افغانستان ته راغلی و او په کندهار کې یې د افغانستان له رییسالوزراء ملا محمدحسن اخند سره ولیدل.
د اسلامي امارت ویاند ذبیحالله مجاهد ویلي، رییسالوزراء په یاده لیدنه کې له افغان ولس او نظام سره د قطر پر لا ډېرو همکاریو ټینګار وکړ او دغه هېواد دې ته وهڅول شو چې د نړۍوالې ټولنې او افغانستان ترمنځ د باور په پیاړي کولو کې لا ډېر رول ولوبوي.
د ۲۰۲۱ کال په اګسټ کې په افغانستان کې له سیاسي تحول وروسته تر اوسه هیڅ کوم هېواد اوسنی سرپرست حکومت پر رسمیت نه دی پېژندلی.
خو قطر، پاکستان، روسیې، چین، ایران او یو شمېر نورو هېوادونو د سرپرست حکومت ډیپلوماتان منلي او سفارتونه یې ورته سپارلي دي.
