غزني او جوزجان کې څلورو کسانو ځان‌‌وژنې کړې دي

غزني ښار، شبرغان (پژواک، ۲۴ غبرګولی ۱۴۰۲): په غزني کې په درېيو جلا جلا سیمو کې درې ځوانانو او جوزجان کې یوې ځوانې نجلۍ ځان‌وژنې کړې دي.

د غزني د امنيې قوماندانۍ ویاند ابو خالد سرحدي پژواک خبري اژانس ته وويل، د دغو ځوانانو له ډلې دوو یې په اندړو او یوه بل یې په مالستان ولسوالۍ کې خپلو کورونو کې ځانونه غرغره کړي او مړه شوي دي.

هغه زیاته کړه، لومړی کس چې شیم نومېږي، ۱۸ کلن او د مالستان ولسوالۍ د سوکه کلي اوسېدونکی دی، د کورني تاوتريخوالي له امله يې ځان‌وژنه کړې ده.

د هغه په وینا، دویم کس شیرمحمد نومېږي، شاوخوا ۲۰ کلن او د اندړو ولسوالۍ د ترکیو کلي اوسېدونکی دی، هغه هم په خپل کور کې ځان په غرغره کولو سره وژلی دی.

د دغې پېښې لامل دقیق نه دی معلوم، خو د سرحدي د معلوماتو پر بنست، د نوموړي پلار ویلي چې له چا سره شخصي دښمنې نه لري او زوی یې ښايي په خپله ځان‌وژنه کړې وي.

نوموړی وايي، درېیم کس خلیل نومېږي، د اندړو ولسوالۍ د خانې‌قلعه اوسېدونکی دی چې خپل ځان يې په مرمۍ ویشتلی او وژلی دی.

د سرحدي په وینا، خلیل ته د خپلې خوښې خلاف کوژده شوې وه، نو ښايي د ځان‌وژنې لامل یې هم له همدا وي.

هغه زیاته کړه، د يادو درېيو کسانو عمرونه له ۱۸ تر ۳۰  کلونو پورې اټکل شوي او ټول ځوانان دي.

سرحدي وویل، د یادو پېښو د روښانتیا لپاره سیمو ته امنیتي او کشفي ځواکونو رسېدلي، څو څرنګوالی او لاملونه یې معلوم کړي.

وخت ناوخته په غزني کې ډېر کله ځوانان نارینه او ښځينه ځان‌وژنې کوي چې همدا دوه اونۍ وړاندې هم د غزني په ګیلان او جاغوري ولسوالیو کې یوه ځوان هلک او یوې ځوانې ښځې ځان‌وژنې کړې وې.

له بلې خوا، د جوزجان د پولیسو ویاند عبدالستار حلیمي د یوې خبرپاڼې په خپرولو سره ویلي: «یوې ۱۷ کلنې نجلۍ چې سبزه‌ګل نومېده او د دغې ولسوالۍ دروستای شورتپه کلي اوسېدونکې وه، ځان یې راځوړند کړی او خپل ژوند یې پای ته رسولی دی.»

د جوزجان د پولیسو د ویاند په خبره، یاده پېښه تېره ورځ له غرمې وروسته رامنځته شوې او لامل تر اوسه روښانه شوی نه دی.

سرچینه زیاتوي، د پېښې په تړاو د کشفي او امنیتي ارګانونو څېړنې روانې دي.

باید وویل شي چې د ځان‌وژنې دغه پېښې داسې مهال رامنځته کېږي چې دغه کار د اسلام سپېڅلي دین له نظره حرام او لويه ګناه ګڼل کېږي.