قلعهنو (پژواک، ۲۶ چنګاښ ۱۴۰۲): په بادغیس کې ځایي سرچینې وايي، په دغه ولایت کې د قیصار – لامان حلقوي سړک د جوړېدو چارې بېرته پیل شوې او په شاوخوا درېیو کلونو کې به ګټې اخیستنې ته وسپارل شي.
د قیصار-لامان حلقوي سړک پروژه د افغانستان حلقوي سړک یوه برخه او یوه مهمه ترانزیټي پروژه ده چې شمالي ولایتونه د هېواد له لوېدیځ او له سویل لویدیځ سره نښلوي، په تېرو کلونو کې د دغه سړک چارې د نړۍوال بانک په مالي مرسته پیل شوې وې، خو بېرته وځنډېدې.
د قیصار – لامان د حلقوي سړک کار له دوو کلونو ځنډو وروسته پرون (چنګاښ ۲۵مه) بېرته پیل شو.
د بادغیس ټولګټو رییس مولوي عبدالرحمن رحماني پژواک خبري اژانس ته وویل، د قیصار ـ لامان حلقوي سړک د درېیمې برخې کار (د بالامرغاب ولسوالۍ له پل کهنه سیمې د دې ولسوالۍ تر مرکزه د ۶۵ کیلو مترو په اوږدوالي) پیل شو.
د سرچینې په خبره، دغه سړک به د بادغیس بالامرغاب ولسوالۍ له پُل کهنه سیمې پیل او د فاریاب تر قیصار ولسوالۍ پورې دوام ولري.
هغه زیاتوي، د یادې پروژې کار به له دوو تر درېیو کلونو وخت ونیسي او د یاد سړک د جوړېدو لګښت د غور سربو کان له عوایدو ورکول کیږي.
د نوموړي په خبره، دا سړک د هېواد له حیاتي پروژو شمېرل کیږي چې د هېواد لوېدیځ زون له شمالي ولایتونو سره نښلوي.
سرچینې وویل، دا سړک چې له بادغیس څخه تر فاریاب امتداد لري، له شپږو شرکتونو سره یې قرارداد شوی او د قرارداد له مخې به یې کار پای ته ورسیږي.
په ورته وخت کې، پر دې لارې یو شمېر موټرچلوونکي د دغه سړک له جوړېدو خوښ دي.
په بادغیس کې یو موټرچلوونکی حضرتګل وایي، د حلقوي سړک د خرابوالي له امله د دوی د درېیو ساعتونو مزل له اتو تر نهو ساعتونو پورې رسېږي.
د حضرتګل په خبره، هر ځل له یادې لارې په تېرېدو سره یې موټر خرابیږي چې دوی زیانمنوي.
نوموړي هیله څرګنډه کړه چې دا ځل دې د دغه سړک کار و نه درول شي او بشپړ دې شي.
یوه بل موټرچلوونکي رضاخان هم د یادې لارې له خرابوالي شکایت لري او د یادې پروژې له پیلېدو خوښ دی.
هغه چې له نهه کلونو راهیسې پر دې لار موټر چلوي وایي، د دغه سړک په پخېدو سره به ارام ساه واخلي.
غړيYou need to subscribe to view the full article. Please login or register a new account.
