میمنه، کلات (پژواک، د زمري لومړۍ نېټه ۱۴۰۲): ځایي سرچینې وایي، په زابل او فاریاب ولایتونو کې په څلورو جلا ترافیکي پېښو کې څلور کسان مړه شوي او څلور نور ټپیان شوي دي.
د فاریاب د پولیسو مطبوعاتي دفتر وایي، تېره ورځ د یاد ولایت کوهستان ولسوالۍ په مرکز لولاش کې د یوه موټرسایکل چپه کېدو له امله دوه کسان مړه شوي دي.
سرچینه د یادې پېښې لامل د موټرسایکل لوړ سرعت او د لارې خرابوالی بولي.
دغه راز سرچینې زیاته کړه، تېره ورځ د یاد ولایت په شیرین تګاب ولسوالۍ کې په یوه بله ترافیکي پېښه کې یو ماشوم مړ شوی دی.
هغه وویل چې یاده پېښه د یوه موټر لوړ سرعت له امله رامنځته شوې ده.
دغه راز د فاریاب ترافیکي پېښو آمر احمدفهیم وایي، په اندخوی – اقینه سړک کې د یو موټرسایکل چپه کېدو له امله موټرسایکل چلوونکی مړ شوی دی.
بلخوا، د زابل ولایتي روغتون سرطبیب نذیراحمد حریفال وایي، نن د زابل ولایت مرکز کلات په جلدک سیمه کې د کابل – کندهار پر لویه لار د یوه فیلډر او لوکسل موټرونه د ټکر له امله د یوې مېرمنې په ګډون څلور کسان ټپیان شوي دي.
. . .
