لغمان کې د ښځو لپاره لسګونه شنې خونې جوړېږي

مهترلام (پژواک، ۵ زمری ۱۴۰۲): د لغمان د کرنې ریاست مسوولین وایي، د دغه ولايت په مرکز مهترلام، قرغيو، الینګار، الیشنګ او بادپښ ولسوالیو کې د پنځوسو شنو خونو جوړولو چارې پيل شوې.

د لغمان کرنې ریاست د کرنیزو چارو امر انجینر بریالي همدرد پژواک خبري اژانس ته وویل چې دغه پنځوس شنې خونې د ملګرو ملتونو د خوړو او کرنې پروګرام په مالي ملاتړ جوړيږي.

هغه د يادو شنو خونو لګښت په اړه معلومات نه درلودل خو زياته يې کړه چې یادې شنې خونې کروندګرو مېرمنو ته په واک کې ورکول کېږي.

د نوموړي په وينا، هرې مېرمنې ته ٣٠ قلمه اړين وسايل هم ورکول کېږي څو د شنو خونو په جوړولو کې ترې کار واخلي.

بل لور ته خلک هم د شنو خونو جوړېدو ته خوښ دي.

د لغمان د مرکز شېرګړ سيمې اوسېدونکي حکمتیار پژواک ته وويل چې د حکومت له لوري موږ ته شنه خونه او ځيني وسايل سپارل شوي دي.

هغه زياته کړه: «زه په ښار کې لاسي کراچۍ ګرځوم، کله کار وي او کله نه وي، اقتصاد مو کمزوری دی خو له دې وروسته به په خپله شنه خونه کې روزمره کار کوم.»

د لغمان د کرنې رياست معلوماتو له مخې، په دغه ولايت کې تر اوسه د يو شمېر نورو موسسو له خوا ٢٢٠ شنې خونې جوړې شوې دي.