<p style="text-align: justify;">خوستښار (پژواک، ٧ زمرى ١٤٠٢): د خوست په اسماعيلخېلو مندوزيو ولسوالۍ کې يو موټر سېلاب وړی چې له امله د يوې کورنۍ پنځه غړي مړه شوي دي.</p>
<p style="text-align: justify;">د خوست د طبيعي پېښو پر وړاندې د مبارزې رييس مولوي دوستمحمد هلال پژواک خبري اژانس ته وويل، دا پېښه تېر ماښام د اسماعېلخېلو مندوزيو ولسوالۍ په مربوطاتو کې شوې ده.</p>
<p style="text-align: justify;">نوموړي وويل، په مړه شوو کسانو کې مور، پلار او درې ماشومان چې عمرونه يې د شپږو او لسو کلونو ترمنځ دي، شامل دي.</p>
<p style="text-align: justify;">دا په داسې حال کې ده چې څو ورځې مخکې د هېواد په يو شمېر نورو ولايتونو کې هم سېلابونو مالي او ځاني زيانونه واړول.</p>
<p style="text-align: justify;">پر خوست سربېره ميدانوردګ، کابل، پکتیا، کونړ، نورستان، غزني او ننګرهار هغه ولايتونه چې وروستیو سېلابونو زيانمن کړي دي.</p>
