کابل (پژواک، ۸ زمری ۱۴۰۲): د افغانستان د کلیو د بیارغونې او پراختیا وزارت مسوولین وایي، تېر لمریز کال کې د هېواد په کچه بېلابېلو برخو کې ۳۹۳ پروژې بشپړې او د پاکو اوبو په برخه کې د ۴۷۴ پروژو چارې نیمګړې پاتې دي.
د یاد وزارت د کلیو د ودانیزو چارو مرستیال مفتي سیداحمد مستقیم نن (یکشنبه) د حکومت د اطلاعاتو او رسنیو مرکز کې ملت ته د دولت حساب ورکولو پروګرام په لړ کې وویل، تېر ۱۴۰۱ لمریز کال کې د هېواد په کچه په بېلابېلو برخو کې۳۹۳ پروژې بشپړې شوي چې څه باندې ۵۰۰ میلیون افغانۍ لګښت راغلی چې ټول لګښت د افغانستان لپاره د ملګرو ملتونو د ماشومانو ملاتړ صندوق (یونیسف) له لوري ورکړل شوی دی.
د هغه په خبره، له دې ډلې په ۲۶ ولایتونو کې د پاکو اوبو رسولو ۱۰۴ پروژې هم بشپړې شوې چې له امله يې یو میلیون او ۴۴۷ زره کسانو ته د څښاک پاکې اوبه برابرې شوي دي.
هغه زياته کړه، د هېواد په کچه د یونیسف په مالي ملاتړ د یو میلیارد او ۲۵۰ میلیون افغانیو په ارزښت د پاکو اوبو رسولو په ۳۸۳ پروژو کار روان دی چې په بشپړېدو سره به يې شپږ میلیون او ۷۰۰ زره کسانو ته د څښاک پاکې اوبه برابرې شي.
نوموړي د یادو پروژو د بشپړېدو د مودې په اړه معلومات شریک نه کړل.
د هغه په خبره، د عامې روغتیا وزارت سره په همغږۍ یې د هېواد په ۱۶ ولایتونو کې د حفظالصحې پروګرام پلې کری چې په پایله کې یې د بامیان ولایت او د کندهار دامان ولسوالۍ تر دې دمه پاک اعلان شوي دي.
د هغه په وینا، ټول هېواد کې له ۴۳ موسسو سره د اوبو د حفظالصحې په برخه کې ۱۰۰ هوکړه لیکونه لاسلیک شوي چې له مخې به یې ۲۸۹ د پاکو اوبو رسولو نوې شبکې او ۷۷۲ نوې څاګانې جوړې شي.
د نوموړي په خبره، د همدې شبکو او څاګانو پر جوړولو ۱۶۳ میلیون او ۵۰۰ زره امریکایي ډالر لګښت راځي چې په پلې کېدو سره به یې دوه میلیون او ۶۰۰ زره کسانو ته د پاکو اوبو رسولو او حفظالصحې اسانتیاوې برابرې شي.
خو دا چې یاد لګښت د چا له لوري ورکړل شوی، په اړه یې معلومات شریک نه کړل.
سرچینې د اوبو لګولو پروژو په اړه وویل، په بادغیس، هلمند، کندهار او خوست کې د کانکرېټي کانالونو،د ۶،۵ کلیومتره پوخ سړک او یوه پل جوړولو، د کارېزونو د بیارغولو او پاک کارۍ، محافظوي استنادي دېوالونو ۲۵ پروژې له داخلې بودجې څخه د ۳۲۷ میلیون افغانیو په لګښت بشپړې شوې دي.
سرچینې زیاته کړه، یاد وزارت له «یونپس» موسسې سره د ۱۵۰ میلیون امریکایي ډالرو په لګښت په ۲۶ ولایتونو کې د سړک او ابیاري په برخه کې د زرګونو پروژو هوکړه لیکونه لاسلیک کړي چې له دغې جملې ۷۰۰ بشپړ شوي او پاتې نورو باندې کار روان دی.
په غونډه کې د کلیو د بیارغونې او پراختیا وزارت د پاکو اوبو رسولو او روغتیا ساتنې رییس مولوي بخت منیرمحمد وویل، د هېواد په کچه د پاکو اوبو رسولو په برخه کې ۴۷۴ پروژو چارې نیمګړې پاتې دي.
د کلیو د بیارغونې او پراختیا وزارت مسوولینو د معلوماتو له مخې، ټول هېواد کې د ولسي تړون پروګرام اته زره پروژو چارې نيمګړې پاتې دي.
غړيYou need to subscribe to view the full article. Please login or register a new account.
