مزارشریف (پژواک، ٩ زمری ۱۴۰۲): د بلخ پوهنې ریاست مسوولین وایي چې د دغه ولایت په ۵۵۴ مدرسو کې د نجونو په ګډون نږدې سل زره کسان پر دیني زدهکړو بوخت دي.
د بلخ پوهنې رییس عبدالجلیل شهیدخېل پژواک خبري اژانس ته وويل، په دغه ولایت کې شاوخوا ۵۵۴ دولتي او خصوصي مدرسې فعالې دي او ۹۹زره ۸۴۲ کسان پکې پر دیني زدهکړو بوخت دي.
هغه زیاتوي چې یاد شمېر زدهکوونکو ته ۵۵۰۰ استادان زدهکړې ورکوي او وړمه ورځ د دې ډلې له ۲۰۰۰ استادانو څخه د ازموینې اخيستو بهیر هم پیل شوی دى.
د هغه په وینا له ۲۰۰۰ کسانو څخه به د ۱۸۵ ښځینهوو په ګډون ۱۴۴۵ استادان جذب شي.
بلخوا یو شمېر استادان چې په ياده ازموينه يې ګډون کړى د دغه فرصت له برابرېدو خوښ دي، وايي چې پخوا بېبرخیلکه و خو اوس سرپرست حکومت ورته ځانګړې پاملرنه کړې ده.
فیضمحمد افغاني د دې ازموینې يو ګډونوال وایي، روانه ازموینه مدرسو کې د استادانو د جذب په موخه اخیستل کېږي.
هغه زیاتوي چې د سرپرست حکومت له حاکمېدو وړاندې دیني مدرسو ته ځانګړې پاملرنه نه کېده خو اوس د پوهنې ریاست د ښوونځیو په څېر مدرسو کې هم استادان ګوماري او معاش ورکوي.
عبدالله د دغې ازموینې بل ګډونوال دوی ته د دغه فرصت له برابرېدو خوښي څرګندوي خو له سرپرست حکومت او سوداګرو غواړي چې خصوصي مدرسو ته د هغوی اعاشې او اباطې برخه کې ورسره مرسته وکړي.
بلخ کې د دیني مدرسو لپاره د استادانو د ګومارنې لړۍ په داسې حال کې پیلېږي چې د سرپرست حکومت مشرتابه د پریکړې له مخې به ټول هېواد کې سل زره استادان په دیني مدرسو کې ګومارل کېږي.
