[restrict paid="true"]
<p style="text-align: justify;">اټلانټا (پژواک، ۱۶ زمری ۱۴۰۲): د احصایې او معلوماتو ملي ادارې د برېښنایي تذکرې بیې ډېرېدو په اړه اوازې رد کړې او په دې اړه یې سپیناوی ورکړی دی.</p>
<p style="text-align: justify;">دغې ادارې په دې اړه په یوه خبرتیا کې ویلي، په دې وروستیو کې په ټولنیزو رسنیو کې داسې ګونګوسې خپرې شوې چې ګواکې د یوې برېښنايي پېژندپاڼې بیه اووه سوه (۷۰۰) افغانۍ ټاکل شوې ده.</p>
<p style="text-align: justify;">سرچینې زیاته کړې، په همدې اساس د احصایې او معلوماتو ملي اداره ټولو هېوادوالو ته خبر ورکوي چې د افغانستان اسلامي امارت د وزیرانو شورا د ۲۱/۰۱/۱۴۰۲ نېټې د ۳۰مې ګڼې مصوبې پر بنسټ د یوې برېښنايي پېژندپاڼې بیه پنځه سوه (۵۰۰) افغانۍ ده او له دې پرته بل هيڅ ډول لګښت نه لري.</p>
<p style="text-align: justify;">په خبرتیا کې راغلي، د دې ادارې اړوند د اسان خدمت په څانګو کې د وزیرانو شورا د پرېکړې له مخې، د یوې برېښنايي پېژندپاڼې بیه له دې امله اووه سوه ۷۰۰ افغانۍ ټاکل شوې چې په بېړني ډول د ۲۴ ساعتونو په موده کې پېژندپاڼه چاپ او غوښتونکي ته سپارل کېږي.</p>
<p style="text-align: justify;">د یادونې ده، د تېر حکومت پر مهال د یوې تذکرې بیه سل افغانۍ وه.</p>
[/restrict]
