کابل (پژواک، ۲ وږی ۱۴۰۲): د ملګرو ملتونو له ماشومانو د ملاتړ صندوق یا یونیسف اعلان کړی چې په افغانستان کې د ماینونو او ناچاودو توکو چاودنو ۸۵ سلنه قربانیان ماشومان دي.
یاد سازمان پرون په اېکس ټولنیزه شبکه کې لیکلي، افغانستان د نړۍ یو له هغو هېوادونو دی چې له جګړو ډېرې وسلې، ماینونه او ناچاوده مهمات په کې پاتې دي.
د دغه سازمان د شمېرو له مخې، په افغانستان کې له جګړو د پاتې ناچاودو مهماتو چاودنو ۸۵ سلنه قربانیان ماشومان دي.
یونیسف ټینګار کړی چې له اروپایي اتحادیې سره په ګډه په افغانستان کې ماشومانو ته پوهاوی ورکوي څو ماینونه او ناچاوده توکي وپېژني او له خطرونو یې ځان وساتي.
دا په داسې حال کې ده چې څه موده مخکې د ملګرو ملتونو د بشري مرستو همغږۍ دفتر (اوچا) راپور ورکړی و چې په تېر میلادي کال کې په افغانستان کې څه باندې اووه سوه ماشومانو ته د ځمکنيو ماینونو، ناچاودو توکو او په لاس جوړ شوو بمونو چاودنو له امله مرګژوبله اوښتې ده.
ویل کېږي چې اوسمهال د افغانستان له څه باندې شپږ سوه کیلومتره ډېره ساحه ماینونه او مهمات لري.
