کونړ کې نږدې ۱۴۵۰۰ کروندګرو ته د غنمو اصلاح شوي تخم او سرې وېشلو لړۍ پيل شوه

<p style="text-align: justify;">اسعداباد - فیروزکوه (پژواک، د لړم لومړۍ نېټه ۱۴۰۲): سيمه‌ییز مسوولین وایي، په کونړ ولایت کې نږدې ۱۴۵۰۰ کروندګرو ته د غنمو اصلاح شوي تخم او سرې وېشلو لړۍ پیل شوه او په غور کې له ۸۰۰ کورنیو سره د خوراکي توکو مرسته وشوه.</p>

<p style="text-align: justify;">د کونړ د کرنې او مالدارۍ رییس پیر حبیب‌الرحمن پژواک خبري اژانس ته وویل چې د دغه ولایت په مرکز او ولسوالیو کې یې ۱۴۴۰۰ کروندګرو ته د غنمو اصلاح شوي تخم او کیمیاوي سرې وېشلو لړۍ پیل شوه.</p>

<p style="text-align: justify;">هغه زیاته کړه چې دغه مرستې د ملګرو ملتونو د خوړو او کرنې نړۍوال سازمان په مالي مرسته وېشل کېږي.</p>

<p style="text-align: justify;">هغه د معلوماتو له مخې، په دغو مرستو کې به هرې کورنۍ ته ۵۰ کیلوګرامه د غنمو اصلاح شوی تخم، ۵۰ کیلوګرامه سپینه او ۵۰ کیلوګرامه توره سره ورکړل شي.</p>

<p style="text-align: justify;">د هغه په خبره، سږ کال به په دغه ولایت کې پر شاوخوا ۲۸ زره جریبه ځمکه د غنمو کښت وشي .</p>

<p style="text-align: justify;">د یو بل خبر له مخې، د غور د کلیو بیارغونې او پراختیا ریاست مطبوعاتي مسوول ذبیح‌الله غوثي وایي چې نن د ملګرو ملتونو د خوړو نړۍوال سازمان په مالي مرسته د دغه ولایت په پسابند ولسوالۍ کې له ۸۰۰ اړمنو کورنیو سره د خوراکي توکو مرسته وشوه.</p>

<p style="text-align: justify;">هغه وایي چې په دغو مرستو کې هرې کورنۍ ته ۲۰۰ کیلوګرامه اوړه، ۲۵ کیلوګرامه دال او ۲۰ لېتره غوړي ورکړل شول.</p>

<p style="text-align: justify;">هغه د معلوماتو له مخې، دغه مرستې د کار په بدل کې ورکړل شوې دي.</p>

<p style="text-align: justify;"></p>