<p style="text-align: justify;">اټلانټا (پژواک، ۱۸ لړم ۱۴۰۲): افغانستان لپاره د ملګرو ملتونو د عمومي منشي ځانګړې استازې او د یوناما مشرې روزا اوتنبایوا، یو ځل بیا د افغانستان د سرپرست حکومت له خوا پر افغان نجونو او ښځو له شپږم ټولګي پورته د زدهکړو په بندیز اندېښنه ښودلې ده.</p>
<p style="text-align: justify;">د ملګرو ملتونو د مرستندویه پلاوي دفتر (یوناما) پر خپله اېکسپاڼه لیکلي چې مېرمن روزا دغه څرګندونې پرون د سعودي عربستان په جدې ښار کې د اسلامي همکاریو سازمان (OIC) له خوا د «ښځې په اسلامي ټولنه کې» تر عنوان لاندې یوه کنفرانس کې کړې دي.</p>
<p style="text-align: justify;">هغې زیاته کړې، د سرپرست حکومت دغو بندیزونو په ټولنیز، اقتصادي، فرهنګي او سیاسي برخو کې هم د افغان میرمنو لاسرسی محدود کړی دی.</p>
<p style="text-align: justify;">مېرمن اوتنبایوا وویل: «پر ښځو او نجونو دغه محدودیتونه هغوی له شپږم ټولګي پورته د لوړو زدهکړو په موسسو کې له زدهکړو منع کوي او د ژوندانه په نورو ټولنیزو، اقتصادي، فرهنګي او سیاسي برخو کې د هغوی لاسرسی محدودوي.»</p>
<p style="text-align: justify;">د یوناما مشرې پر دې خواشیني ښودلې چې اوس پر نجونو او ښځو باندې د واکمنانو دغه محدودیتونه د هغوی د حکومتدارۍ د سیسټم یوه برخه ګرځیدلې دي.</p>
<p style="text-align: justify;">نوموړې ویلې چې له کومو افغان میرمنو سره یې چې کتلي، له ۴۶ سلنو زیاتو یې د سرپرست حکومت رسمیت پېژندلو سره مخالفت ښودلی دی او ۵۰ فیصدو نورو ویلي چې د حکومت رسمیت پېژندل باید د سرپرست حکومت له خوا د ښځو حقونو رعایت کولو پورې مربوط شي.</p>
<p style="text-align: justify;">یوناما ویلي: «په افغانستان کې د اسلامي همکارۍ د کنفرانس او د دغه کنفرانس د غړو هېوادونو پیغام او د اسلامي نړۍ ګډ غږ باید واورېدل شي، هغه دا چې ښځې په ملي کچه د بدلون د سفر، انکشاف او ودې لازمي برخه ده.»</p>
<p style="text-align: justify;">په دغه کنفرانس کې د ملګرو ملتونو د ښځو د چارو مرستیالې سیما بحوث او د افغان میرمنو ځینو استازو هم برخه اخیستې وه.</p>
<p style="text-align: justify;"></p>
