د غور د لوړو زده‌کړو له موسسې تازه فارغ شوي له حکومته د کار زمینې برابرولو غوښتنه کوي

فېروزکوه (پژواک، ۲ لېندۍ ۱۴۰۲): د غور د لوړو زده‌کړو له موسسې تازه فارغ شوي ځيني محصلین له حکومته غواړي چې دوی ته د کار زمینه برابره کړي څو د خپل مسلک له لارې وکولای شي هېواد او خلکو ته خدمت وکړي.

نن سهار د لېندۍ په دویمې د غور لوړو زده‌کړو موسسې محصلینو د اتمې دورې فراغت غونډه د دغه ولایت د مقام د کنفرانسونو په صالون کې د دغه ولایت د ځایي مسوولینو په حضور ونمانځله.

د غور د لوړو زده‌کړو له موسسې د بیولوژۍ له څانګې یو فارغ شوی محصل صاحب‌خان نظامي وایي: «زما غوښتنه له دولته دا ده چې موږ ته دې د کار زمینه برابره کړي څو وکولای شو خپلې ټولنې او خلکو ته خدمت وکړو.»

هغه بې‌کاري لویه ستونزه بولي او وایي چې هر کال ډېر تحصیل کړي ځوانان د کار نشتوالي له امله اړ کېږي چې هېواد پرېږدي.

په ورته وخت کې د بیولوژۍ څانګې یو بل فارغ عبدالرحمن احمدي له خپله فراغته خوښي وښوده او له حکومت غواړي لکه څرنګه یې چې ورته د زده‌کړو زمینه برابره کړې وه د کار زمینه دې هم ورته برابره کړي.

نوموړي وویل: «نن ډېر خوشحال یم چې له څلورو کلونو تحصیل وروسته فارغېږم، زه له دولته غواړم لکه څنګه چې یې موږ د تحصیلاتو زمینه برابره کړې وه، د کار زمینه دې هم راته ته برابره کړي، څو وکولای شو کار وکړو د دولت او خلکو لپاره خدمت وکړو.»

دغو مراسمو کې د غور د لوړو زده‌کړو موسسې رییس مولوي عبدالعالي لبیب وویل چې دې دوره کې له بېلابېلو برخو ۲۷۰ محصلین فارغ شول.

نوموړي زیاته کړه: «زموږ محصلین له ۱۱ څانګو فارغ شول، هیله مند یم چې وکولای شو راتلونکي کې ډېر محصلین جذب کړو.»

هغه وویل، دوی د لوړو زده‌کړو وزارت په همغږۍ او ملاتړ وکولای شول چې د دې موسسې د استادانو د پوهې کچه لوړه او د دې موسسې پرسونل له ۱۰۰ تر ۱۷۰ کسانو ته ډېر کړي، څو وکولای شي په دې موسسه کې با کیفیته زده‌کړې وړاندې کړي.

په ورته وخت کې د غور ځایي ادارې مسوولین وایي چې اسلامي امارت رهبري هڅه کوي څو د هېواد له ښوونیزو مرکزونو فارغو شوو ځوانانو ته د کار زمینه برابره کړي.

د غور د والي ویاند مولوي عبدالواحد حماس وایي: «موږ هیله لرو چې ځوانان له خپلې دیني او علمي زده‌کړې د هېواد پرمختګ لپاره استفاده وکړي، اسلامي امارت هڅه کوي څو ځوانانو ته د لا ډېر کار زمینه برابره کړي.»

هر کال سلګونه محصلین له پوهنتونونو او د لوړو زده‌کړو له موسسو فارغیږي او له حکومته د کاري فرصتونو د برابرېدو غوښتنه کوي.