<p style="text-align: justify;">ګردېز (پژواک، ۸ مرغومی ۱۴۰۲): د کډوالو او بېرته راستنېدونکو چارو سرپرست وزیر خلیلالرحمن حقاني وايي، د هېواد ټول دیني عالمان دې د اوسني نظام د مخالفینو پر ضد فتوا ورکړي او د فلسطین د غزې خلکو غږ اوچتول د ټولو ګډ مسوولیت دی.</p>
<p style="text-align: justify;">هغه دغه څرګندونې پرون د پکتیا مرکز ګردیز پیرباغ سیمه کې له یوې جهادي مدرسې د ۶۲ کسانو فراغتغونډې ته کړې دي.</p>
<p style="text-align: justify;">هغه وايي، اوسنی نظام په ټولو اسلامي اصولو برابر دی او هیڅوک هم دا شک نه لري چې دغه نظام دې د شریعت خلاف وي نو دیني عالمان باید خپل سکوت مات کړي.</p>
<p style="text-align: justify;">هغه زیاته کړې چې د اسلامي نظام د راوستو لپاره په سلګونه زرو کسانو قرباني ورکړې او د ساتنې لپاره یې باید اوس د ټول افغانستان دیني عالمان په یوه خوله د مخالفینو پر ضد فتوا ورکړي.</p>
<p style="text-align: justify;">حقاني زیاتوي: «... هر هغه څوک چې د دغه موجوده نظام خلاف فېسبوک کې په داخل او خارج کې کمپاینونه کوي یا ډودۍ، وسله یا لارې ورته ښیي او جاسوسي ورته کوي ایا دا واجب القتل دي کنه دي؟ ولې نو پټه خوله ناست یی شیخ صاحبانو، د ټول افغانستان علما په یوه خوله ولې دا فتوا نه ورکوي. هر هغه څوک چې د دغه نظام چې څلوېښت لکه شهیدان یې د اسلامي نظام لپاره ورکړي او نن ورسره یو څوک لوبې کوي، هغه که په داخل کې دي که په خارج کې دي باید په یو اواز دا علما راجګ شي او په وړاندې یې کلکه فتوا ورکړي.»</p>
<img class="alignnone wp-image-586299 size-full" src="https://pajhwok.com/wp-content/uploads/2023/12/411246851_379954627923271_7312139522538595732_n.jpg" alt="" width="1920" height="1280" />
<p style="text-align: justify;">هغه وویل چې افغانستان کې پرته له اسلامي نظامه بل هیڅ نظام ته اجازه نه ورکوي او تر اخیره به له اوسني نظام دفاع کوي او هر هغه څوک چې د اوسني نظام په وړاندې توطیې جوړوي دوی به یې پر وړاندې دریږي.</p>
<p style="text-align: justify;">دغه راز د کډوالو او بېرته راستنېدونکو چارو سرپرست وزیر د فلسطین غزه کې روان ناورین ته په اشارې وویل چې بیت المقدس په ښکاره توګه د اسرائیلو تر سلطې لاندې دی او د غزې د مظلومو خلکو غږ اوچتول د ټولو ګډ مسوولیت دی هغه که په هره کچه وي باید راپورته شي.</p>
<p style="text-align: justify;">د یادوني ده، د تېرې اکتوبر میاشتې له اوومي د حماس او اسرائیلو ترمنځ جګړه پیل شوي، یو میاشت وړاندې یو لنډمهالی اوربند وشو خو له شپږ ورځو وروسته اسراییلو بیا پر غزه بریدونه پیل کړل.</p>
<p style="text-align: justify;">راپورونه ښیي چې تر اوسه د اسراییلو په بریدونو کې لږ تر لږه شل زره فلسطینیانو - چې ډېر یې ملکي وګړي دي - ژوند بایللی او ۵۰ زره نور ټپیان دي. دغه راز اسراییلو ته هم درنه مرګژوبله اوښتې ده.</p>
